Jowai: Ka International Mother Tongue Day næ ka Mother Language Day toh kawi na ki sngi kawa ka United Nations Educational, Scientific and Cultural Organization (UNESCO) da chimkhia ko wow yaklam kyrpang heiyatoh wei pynneh pynsah yei man kyrpang ki jaitbru waphær yong ka pyrthai iwa man hei ktien, i klam, i riam i bait, i kup i sem wa kiwi kiwi.
Ya kani ka sngi da sdang nyngkong da ka UNESCO ha u snem 1999 yong ka 17 u Khonchonglad neitæ hadien won da pynskem ya ka ha ka 21, Thohlakhmi yong u snem 2000 deiwa pynchong yurim ya ka sngi wa chah siat ki soo ngut ki khynnah puræ ha Bangladesh kawa da jia ha u snem 1952 yong ka 21, Thohlakhmi heiyatoh wei yakhih yongki u dawa wow pynman ya ka ktien Bengali kam kawi na ki ktien kyrpang ha East Pakistan.
Ha uni u snem ka UNESCO da booh wa ka mat kyrpang yong ka International Mother Tongue Day toh kawa ong “Indigeneous language matter for development, peace, building & reconciliation”.
Kat kam ki sabut yong ki bru thoohbniah da ong wa 43 na ka 100 yong ki 6000 tylli ki jait ktien wa yaklam da ki jaitbru waphær yong ka pyrthai em sadu kamwa kajiak spah donhi kiwa dang yaklam hadooh katni wei kiwa boon hi da sdang ki u dooh u dam.
Hei booddien wow sakhi ya kani ka sngi ha chnong Jowai da chem wa ki bor pait bor pynlai yong ki skur kam ha Loompyrdi Iongpiah, Chilliangraij, Loomiongkjam, Panaliar da ka luti yong i sñiawkhia yei man kyrpang yong kani ka sngi heiyatoh wei pynneh pynsah yei ktien i thylliej da chimbyntalang ki wow leh burom dei wa pynman ya ka prokram yaklam pynsñiawthooh ya ki khynnah skur chaphang i kordor yong i ktien i thylliej, i riam i bait, i kup i sem wa kiwi kiwi.
Chooh chooh leh ha kani ka sngi da sakhi wa ki khynnah skur dei sñiawsarong yei man kyrpang ka jaitbru da ku tyngkong ki leh wow pynyoorong yei riam i bait, i kup i sem wa i chaad i rwai sur tre.
Discussion about this post