La 16 sien pynsangeh ka jylla ya i kreh ka sorkar Assam ha khappood: Conrad

U montri rangbah ka jylla, u Conrad Sangma ynne da ong u wa ka sorkar jylla da pynsangeh ko hadooh 16 tylli ki kreh wa da sdang ka Assam nadooh u 2018 wei ini man i mar dei kylla yeiwa ong wa du ka Assam wa pynsangeh yei kreh ka Meghalaya.

Yeini da ong u Conrad ha ka ‘Short Duration Notice’ wa wanrah u MLA ka Congress na Nongpoh, u Mayralborn Syiem, heiwa u Conrad da ong u wa na kini, 14 tylli ki kreh toh ha Ri-Bhoi heiwa da sdang da ka Assam wa Meghalaya nadooh u 2018 hadooh u 26 tarik u Thohlakhmi uni u snem wei ha ini i jooh i por, da sdang ya 12 tylli ki kreh wa sdang da ka Assam waka Meghalaya ha West Jaiñtia Hills, 6 ha West Khasi Hills wa 2 ha South West Garo Hills.

Hawa phiah ya ki District katkam ki kreh wa sdang ka Assam, u Conrad da pyntip u wa ha Ri-Bhoi em ar tylli ki kreh wa da pyndep, 2 da pynsangeh wei 4 tylli dang lai ki chaphrang. 

Ha West Jaiñtia Hills- iwi i kreh wa dadep, 8 wada pynsangeh, iwi i kreh ha West Khasi Hills wa dadep wei 4 da pynsangeh katwa ha South West Garo Hills District 2 wa da pynsangeh ka Meghalaya.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Heiyatoh wa ki kaam pynroi wa pynkreh da ka Meghalaya ha Ri-Bhoi, iwi wa dadep, 4 pynsangeh ka Assam, ha West Jaiñtia Hills 2 tylli dadep wei iwi dang kreh katwa ha West Khasi Hills iwi i kreh toh iwa da dep.

Da pyntip u leh wa nadooh u 2018 hadooh 26 Thohlakhmi uni u snem i awri ha khappood ha u snem 2018 da em 28 sien, 2019– 33, 2020– 39 wa 2021– 6 sien.

Neiliang u MLA ka Nongpoh da ong u wa wot hapyrdi i awri wa i kajia pood emkaam wa ki kaam pynroi u pteiñ ki na waroh arliang deiwa pynsñiaw yei sñiawkhia wa ka Assam toh kawa pynthut ya i kreh neipor cheipor wot em ki por da pynthut ko leh ya ki kreh kiwa ha ki thaw wa haap bha hapoh ka Meghalaya. 

“Ka Assam da chna ko ya ka Transit Camp ha Khanapara nadooh u 2019,” da ong u MLA ka Nongpoh. 

Da kdaw u leh wa ha ka 23 Kmaichonglad u snem wa dadep ka Khasi Hills Autonomous District Council da thoh ko cha ka sorkar Assam wow pyrchah ya i kreh wei hadooh katni dang pteiñ hi i deiwa kyntu ya ka sorkar jylla wow chimkhia yeini. 

U MLA ka Nongpoh, u George B Lyngdoh da ong u wa ka sorkar toh u thung ko ya ka takit wa ha khlieh heiwa kammon da chah ya ka Assam wow chna ko ya ka Transit Camp hapoh Meghalaya. 

Da pynrap u Lyngdoh deiwa ong wa lada em kiwa chukor ya ka jylla emkaam wow pynchitom ya ki.