U Montri Rangbah ka jylla, u Conrad Sangma ynne ka sngi hapoh ka yung dorbar chna aiñ da pyntip u wa nadooh wa khang ka NGT wow tih mooyong hapoh Meghalaya da em 250 tylli ki Case wa da dep Register pyrchah ya kiwa leh pyrchah yaka hukum wei ha kini ki bnai wa da dep da kem ya kamwa 95 ngut ki bru wei da dep Charge Sheet ha 146 tylli ki kaam pyrchah aiñ.
Ya ini da jubab u Conrad yeiwa kylli u MLA ka West Shillong Constituency u Mohendro Rapsang lada ka sorkar India da kyntait ko wa em i thih wei chalan ya u mooyong pyrchah yaka aiñ katkam wa da e yutip ka sorkar Meghalaya.
U Conrad da pyntip u wa ka sorkar India da jubab ko hapoh ka Rajya Sabha wa ka sorkar Meghalaya da leh ko yeiwa emkaam yow khang yei tih mooyong pyrchah yaka aiñ deiwa pynkrehkaam ya ki kyndon Section 21 wa Section 22 ka aiñ Mines and Minerals (Development & Regulation) Act 1957 kawa da e bor ya ki DC wa ki SP wow pynkrehkaam yaka hukum ka NGT kamjooh yow kdoh u khoom ya kiwa leh pyrchah yaka aiñ.
Kamtæ u Rapsang da kylli biang u wa lada em næ ym em i thih mooyong lane i chalan mooyong pyrchah yaka aiñ heiwa u Conrad ym em ong u wa em lane ym em tangwa da ong u wa ka sorkar da klam che ko wa ym chah ko ya kiwon kiwon ki kaam wa pyrchah yaka aiñ heiyatoh wa u mooyong.
Neiliang u Rapsang da kylli u wa na ka takit ya kiwa chah kem, ka sorkar chemdien ko wa lada u mooyong wa chalan toh uwa dang dep tih thymme næ uwa rim, heiwa u Conrad da jubab u wa nadooh wa wan kani ka sorkar da pynkrehkaam ko yaka aiñ MMDR yow pait ya ini i kaam heiwa ki kyndon toh kiwa khor bha heiwa daw chah kset patok hadooh 5 snem waka kuna wa T. 5 lak wei heiyatoh wa neiwon mih u mooyong, u Conrad da ong u wa ka takit dang lai ko chakhmat.
