Ynne ka sngi u Montri ka chnat Arts & Culture ka jylla, u Sanbor Shulla hadien wa yoh u ya ka ujor na ka seiñ JSU da lai pait u ya ka Amphitheater kawa em ha Moolasyat, Jowai (hajan Jowai District Jail).
Neiliang ka JSU da ong ko wa hanla dadep wai ya kani ka Amphitheater ha ka 3 Naisaphra 2017 da u Symbood Montri Rangbah warim ka jylla, u Prof. RC Laloo wa u Montri ka chnat Arts & Culture tangwa hadooh ynne ka sngi ya kani ka thaw da ieh khlem pynemkaam ya ka.
U Montri hadien wa pait u ya ini i thaw da ong u wa phylla wa hadooh ynne ka sngi ym em pynemkaam ya ka hanlada dep wow chna ya ka nadooh u 2017, ini pynyoo wa ka chnat ya ka leh ymbien ko wow pynemkaam wot ya kiwi kiwi leh ym elaad ko wow pynemkaam.
Da ong u wa ini pynyoo i yei tlot ka chnat neibhah la san snem wa dadep chna tangwa hadooh katni dang neh kamjooh khlem pynemkaam.
Da kular u wow chimkhia wow pdiang ya ka chithi na ka JSU wa ka Dorbar Chnong Mihmyntdu wow chna pynmiat ya kani ka thaw, wow taan ya ka bordiñ, kamjooh leh u booh ya ka thaw pynyieñ kari.
Heijooh i por da ong u wow e kti noh ha ka JSU wa ka chnong wow pynemkaam ya kani ka thaw neibhah katkam wa man hi ya ini i thaw da chna wow pynemkaam ki paidbah.
Hawa kylli, u Sanbor da ong u leh wa neiliang yong oo daw phah hajir u ya ki sahep ka chnat wow tip neiyi i daw wa ieh ya ini i thaw khlem pynemkaam.
Chooh chooh da kyntu u ya ki seiñ wa ki waheh chnong wow wan ki chaphrang wow pyntip yeiwa chah ieh ki thaw sorkar khnang wow ye wow leh yeiwa emkaam.
