U Montri Rangbah ka jylla, u Conrad Kongal Sangma da ong u wa ka sorkar daw chimkti noh ko ya i thaw ha Sweeper Colony (Them Iewmawlong) ya iwa da yooluti wow pyndep noh hapoh chi tayaw heiwa u sdang kyrriah noh ya ki bru kiwa sah ha ini i thaw.
Ka Dhab ki Montri (Cabinet) yong ka sorkar MDA ynne ka sngi da yaklam yillu bha hajrong ka bui wa ekti da ka High Level Committee hajrong i kyrriah noh ya ki bru na ini i thaw wa tip kam ka Sweeper Colony næ Them Metor.
U Conrad da ong u wa ka HLC da batai bniah ko ya i man i long wa i jia heiyatoh wa ini i thaw wei hawa kut da chim le tylli ki rai, kini ki rai kynthup ki hajrong i mantre ya i thaw neibhah waroh chi kattu da em i kulmar. Da ong u wa neibynta i thaw da soi ya ka soskular wa ki le liang (Tripartite Agreement) wow chimkti noh da ka chnat Urban Affairs wa ka Shillong Municipal Board ya i thaw na u Syiem ka Hima Mylliem, wei da pynrap wa neibynta wow chimkti pura daw chimpor sa kamwa chi tayaw.
Chooh chooh da pyntip u wa ka sorkar da rai ko wow kyrriah noh ya ka yung krehkaam ka Shillong Municipal Board na Bishop Cotton Road cha yung krehkaam warim ka MBDA, neibhah i thaw wa da booh ya i yung krehkaam ka SMB katni toh i thaw sah (Quarter) ki wakreh ka chnat wei ha ini i thaw wa em ka yung krehkaam (SMB) daw wanrah noh ya ki bru na Sweeper colony.
Katkam i pyntip u Conrad em kamwa 157 tylli ki manyung kiwa sah ha Sweeper Colony heiwa kamwa chiteiñ (50%) na ki da mih chwa ki na ini i thaw katwa kiwa dang sah ha ini i thaw sorkar daw pyntip wow kyrriah noh ki.
Heijooh i por da ong u wa iwi tawon i rai wa ka sorkar da chim ko toh wa ka chnat Urban Affairs u kyrriah noh ko ya waroh ki bru wa chong tooh ha ini i thaw chawi tawon wa da pynkhreh, wei hadien ini daw pyntip ya ka sorkar wow chim da kiwi tawon ki rai.
Heiyatoh wa i kyrriah ya kiwa chong tooh (Pyrchah aiñ), u Montri Rangbah da ong u wa ka sorkar hap pynbiang ko ya i thaw neibhah wa em ki kyndon (Procedure) wow kyrriah ya ki bru na kiwon kiwon ki thaw wei ka sorkar leh daw hap bood ko ya ki kyndon, wei hadien itæ ka chnat Urban Affairs daw e ko ya ka rai kammon wow leh ya ki bru kiwa chong sah bait ha ini i thaw.
Hajrong ka Status Quo wa da pynmih da ka yung bichaar High Court, da ong u wa ka sorkar hap yakhun ko ya ini.
Ha iwi i liang da ong u leh wa ini i kaam da man iwa slem bha wei u pynbait leh daw chimpor i deiwa pynrap wa ini toh ka sien wa nyngkong wa ka sorkar da chimkhia ko ya ini i kaam wow pynbait noh chisien donhi.
