July 1, 2019

La ar bnai sangeh i taan um na ki krem mooyong wa em ha Ksan wa dang pteiñ i chlai um

Advertisement ad1

Jowai: Nadooh wa joor u slap ha u Naisan (May) kawa da pynchlai yaka wah Leteiñ haka 01-05-19, hadooh ynne ka sngi ym em de ye wow taan um na ki krem mooyong wa em ha Ksan, EJH heiwa da em kiwa tih mooyong kiwa chah kset hadien wa chlai um ka krem moyoong wa em ki hapoh nadooh u Kmaichonglaad 2018.

I chlai ka wah Leteiñ iwa neh hadooh katni da khang ko ya ki kari wa kit yaki bru wa pynkrehkaam ya ki Pump taan um kamjooh leh ym ye de wow pynpoi ya ki baam kiwa kreh, ki phniang wa emkaam ki Generator wa kiwi kiwi.

Advertisement ad1

U slap da pynsih u leh ya ki Generator kiwa pynemkaam ha kani ka thaw wei ym pu ye wow pynchna ya ki.

Kamtæ ka kreh da sangeh ko kattu la ar bnai wei neiliang ka sorkar hadien wa yoh ko ya ki chithi na kiwa ha yung ha sem kiwa chah kset wa hun ki wow pyndam noh yei yaleh wow sai ya kiwa chah kset lada biang i su ka sorkar.

Ka sorkar leh da pynkhreh ko wow rah ya kini ki chithi hakhmat ka Supreme Court kawa da e hukum toh wow pteiñ bait yei thooh ya kiwa chah kset lada man ki kiwa dang im namo kiwa da khlaad hadien wa yaleh PIL da uwi u muktiar hei yatoh wa ini wa jia wei ya kani ka mukotduma ye wow chong bichaar biang yaka ha uni u bnai.

Ha kani ka thaw wa em ka krem mooyong wa em kiwa chah kset dang sah ki dkhot ka SDRF, ki chipai ka Battalion wa kiwi kiwi kiwa ym pu em yoh yaka hukum wow mih na kani ka thaw neidaw wa dang em ko haka bichaar ka Supreme Court.

Neiliang ka bor District man ka sngi dang phah ko yei baam cha ki da ki arngut ki bru kiwa kit yei baam kiwa tip pyrtuid kam u John wa u Meba kiwa hap wow ku na ki loom yow lait ki nei chlai um man ka sngi kamjooh yow kit ya kiwi kiwa emkaam kiwa dang em ha kani ka thaw kam i phniang yow yoh bordiñ ki.