La man katwa man ym khut yaklam ka sorkar ya ka KSU: Dr. Mukul

Shillong : U Dr. Mukul Sangma hawa pynsñiaw yei eh wa yachem ka sorkar wow khut yaklam ya ka Khasi Students Union kawa yakhih pyrchah ya ka luti rel, da ong u wa la man katwa man ka sorkar ym khut yaklam ko wot ya ki seiñ kieñ suloi leh kiwa pynthut yei suk i saiñ wei ya ki seiñbhalang won da tip hi kammon u yakreh wa ki.

Heijooh i por u Montri Rangbah da maham u ya kiwa emkti wa kawon kawon ka seiñ kieñ suloi, wei ka aiñ u kreh bait ko yei yongka i kaamram. Da ong u wa em ar jait ki seiñ, kawi kawa da kheiñ pyrchah ka sorkar katwa kawi won ki damok wa pynthut yei suk i saiñ.

Da kyntait u leh wa ka sorkar jylla jooh khut yaklam ko ya ki seiñ kieñ suloi wei yeini da leh du da ka sorkar pyrdi hei yakrehlang wa ka sorkar jylla.

Da ong u wa ha u snem 2004 ka ANVC da jan wan pyndem lut ki waroh ki dkhot yong ka khlem tip ki wa yahkhmat ka sorkar iwa man iwa bakla wei ka sorkar tip hi ko kammon u leh ya kam kini ki seiñ kieñ suloi.