Neiliang u MLA ka Nongpoh, u Mayralborn Syiem ynne hapoh ka yung dorbar da wanrah u ya ka phang hakhmat ka sorkar hajrong i yakhih ki wakreh ASHA ka jylla wa duna ka nong ki kawa du T. 66 chi sngi kamjooh leh wym em su ya nong yong ki najrong wa kreh chitom ki wow yarap ya kiwa punkhon, ki khynnah kamtam ha ki por wa em ka khlam COVID-19. Heiwa da ong u wa sñiaw yahaap wow pynku ya ka nong sngi ki cha ka T. 300 kamwa da dawa ki, wei wow pynlait leh ya ka poisa wa toh u yoh ki hapoh Meghalaya Maternity Benefit Scheme (MMBS) deilang waka poisa wa kreh ki neibynta ka khlam COVID-19.
Hawa pynche yeini, neiliang u Montri wa pait ya ka chnat i chait i khiah, u James PK Sangma da ong u wa ki ASHA man ki kam ki Health Volunteer hapoh ka National Health Mission (NHM) nadooh u 2005 heiwa da jied ya kiwa chong chnong deiwa e nong (Incentive) ya ki katkam i kaam wa ye ki u pyndep heiwa hapoh ka jylla ki AHSA wa em ha ki thaaiñ palat sor da em ki 6801 ngut katwa ha ki thaaiñ sor da em ki 250 ngut iwa mut wa waroh da em ki 7051 ngut. Da pyntip u leh wa hadooh u snem 2018 da em ki 6090 ngut.
Heiyatoh wa i rukom su ya ki ASHA da pyntip u wa hapoh ka NHM da em 6 jait ki kaam wa yatoh wa kiwa punkhon wa i chait i khynnah (Reproductive & Child Health Programme) da yoh ki T. 7651, yei lai e tika da yoh ki T. 375, yow pynkhlan ya ki kaam sumaar sukhær da yoh ki T. 1200, manda kreh heiyatoh wa ki kjut ki wym yabi da yoh ki T. 60, ki kjut wa yabi da yoh ki T. 1550 wei da yoh ki leh T. 1000 naka sorkar pyrdi manda kreh wa ki kaam wa yatoh wa u COVID-19.
Chooh chooh da pyntip u wa nadooh u Naitung (Apr) 2021 ka sorkar Meghalaya leh da sdang ko wow su T. 2000 chi bnai (Fixed Incentive) wei da e ka sorkar jylla leh ya ka bai kreh COVID-19 kawa T. 1000 chi bnai. Wei da ini, ki ASHA da yoh bait ki ym duna ya T. 4000 chi bnai khlem da kheiñlang ya iwa da su hapoh ka NHM.
Wei deiwa kheiñ won sa iwa yoh ki na ki kaam wa da leh hapoh ka NHM iwa yoh boon ki katwa boon i kreh wa leh ki nadooh iwa yatoh wa i chiat i khiah kiwa punkhon, ki khynnah, i e tika wa kiwi kiwi daw poi T. 5000 hadooh T. 10,000 chi bnai, da ong u Montri.
U Montri da pyntip u wa heiyatoh wa poisa (Incentive) hapoh ka NHM, dadep wow pynlait cha waroh ki District. Dadep leh wow pynlait ya ka nong ki ASHA kawa napoh ka jylla kawa T. 2000 wa ka bai kreh COVID-19 kawa T. 1000 leh dadep pynlait cha waroh ki District ha ki ar bynta kawa nyngkong da pynlait ha ka 21-09-21 wei kawa ar toh kawa da pynlait hadooh i bhah yong uni u bnai.
Da mynjur u leh wa em hi i slem hawa kreh yow pynlait ya ka poisa neidaw wa jrong iwa hap wow leh heiwa ki ASHA hap pyndap ki ya ka Form wa pynyoo ya ki kaam wa da leh ki yow e cha ki ASHA Facilitator, kiwa daw e won cha ki ANM yow pyntikna, dep te e won cha u Doctor yow soi u wei daw lai e ya kani cha u Accountant ka PHC yow pynkhreh u ya ka poisa. Kamtæ u James da pyntip u wa dadep wow pynkhreh da ka Mobile App kawa tip kam ka ASHA & ASHA Facilitator Payment App yow pynsmat yei su kamjooh yow suk ki ASHA wow pynyoo iyi i kreh wa da dep leh ki wei yeini da dep wow pyrchang hapoh ka Umling Block, Ri-Bhoi heiwa hapoh 48 kynta da yoh ki ASHA ya ka poisa ki wei daw wanrah ya ini ha waroh kawi ka jylla ha u Naitung (Apr), 20222.
Chooh chooh da pyntip u wa ha kini ki soo snem ka sorkar da dep ko wow pynlait T. 151 klur ka poisa cha ki ASHA wa kynthup ya ka poisa wa dang sah kamjooh ka poisa hapoh ka MMBS. Deiwa kdaw leh wa nadooh u 2013 hadooh 2018 da pynlait du T. 48.87 klur donhi. Heiwa du ha u 2020-21 da pynlait T. 59 klur iwa da man hadooh T. 7000 kawi ka ASHA.
Kamtæ u James da ong u wa i yoh ki ASHA du T. 66 chi sngi toh iwa yahbakla neibhah dapoi T. 233 chi sngi.
Puræ leh: Kular ka sorkar wow su noh ya ka tulop ki ASHA hadien wa mih lai paidbah
