U President ka Nationalist Congress Party (NCP) uwa man leh u MLA ka Gambegre, u Saleng A Sangma da ong u wa ki paidbah toh u sñiawthooh ki wei toh u Vote ki neibynta yong-ki dahi ym neibynta u MLA næ ya kawon kawon ka Party.
Da ong u wa lada ki paidbah em ki i pyrkhat wow Vote neibynta yong ki dahi, neibynta ka chnong ka thaw wa neibynta ka jaitbru, hadien habood ym em de kawon kawon ka yakhih næ i yaleh pyrchah.
Hawa yaklam wa kiwa pathai khubor ha Shillong, u Saleng da ong u wa ym em u i thmu wow mih na ka NCP næ wow lai psiah cha kiwi ki seiñ saiñ pyrthai kam kiwi ki bru kiwa khlem yurim, tangwa daw pyrchang u wow pynku ya ka NCP hapoh ka jylla deiwa kyrchaan kiwa yahkhmat na Delhi, heiwa da klam che u wa ymye u wow lehke wa ki paidbah.
Hajrong i rukom krehkaam kiwi ki seiñ, u Saleng da ong u wa ymtip u wow batai ya kiwi ki seiñ wei ya i rukom krehkaam yong ki, tangwa lada wan kawon kawon ka seiñ saiñpyrthai toh nei mon wa i jied ki paidbah, wei lada ki paidbah bakla ki wow jied ya ki bru kam kiwa mihkhmat næ ya kawon kawon ka seiñ, hadien ka Election daw mih biang i jooh i eh i khoo, i yakhih wei itæ chong i ha ki paidbah wa jied ya ki.
