U Montri wa pait ya ka chnat i chait i khiah ha ka jylla, u Alexander Laloo Hek da ong u wa i long i man ha ka jylla na u COVID-19 ym pu chngaaiñ ko, tangwa ka sorkar hap ko wow pyrkhat leh neibynta kiwa chong chnong wow yoh ki u lai cha ki kaam ki jam wa man-ka-sngi.
Kam wow kdaw heini wa ka sorkar hadien 2 bnai duna da pyndam yei khangsbak ha ka jylla nadooh ynne ka 21 tarik, tangwa da e bor leh ha ki Deputy Commissioner wow pait ki yei long i man wei wow booh yei pynrkhiñ wow yada nei maa i yabi u khñiang khlam COVID-19.
Hawa kylli, u Hek da ong wa ym ye wow ong wa lada i long i man da chngaaiñ ko na u COVID-19, hanla ynne ka sngi da hiar kiwa yoh ya uni u khñiang cha 269 ngut, deiwa ong wa kamwa man katni da sakhi wa da hiar i poor ka khlam man-ka-sngi, wei lada kiwa yoh hiar bait i kamwa 10 sngi khlem sangeh, ye wow ong wa da rap chngaaiñ.
Da ong u wa toh sakhait wa i chait i khiah man i iwa emkaam, deiwa ban wa ka chnat i chait i khiah ym pu yoo chngaaiñ ko, tangwa ka sorkar hap ko wow pait ya kawi ki liang wa ki paidbah tyngkhooh ki yei eh yow yoh yei kamai kajih.
