U Montri sorkar thymme uwa man leh u MLA ka BJP na South Shillong, u Sanbor Shullai da ong u wa lada ki bru e ki 33 ngut ki MLA ya ka BJP yow ye u chna sorkar, daw kai i dood wa i um-ngap wei ka Meghalaya leh daw kylla ko.
Deiwa kyntu ya ka paidbah wym toh wow ap yei pynbaad ki bru pyrchah ya ka BJP deiwa pyrkhat ya u kpoh wa ya ka mynried, toh u kynmoo ki ya u syntu neibhah waroh yoosuk ya u syntu wei manda thap Vote wow khniooñ ha u chap syntu.
Hawa kylli da ong u wa lada yoh ka BJP wow chna ya ka sorkar wa pura, ka Meghalaya leh daw yoh bait ko ya ka ILP.
Da e nongmuna u leh ya ka Nagaland kawa em 90% ki Christan heiwa da yoh ka BJP 13 ngut ki MLA heiwa katni u Symbood Montri Rangbah toh u BJP.
Hawa kylli wa lada em i ya kajia hapoh ka Party, da ong u wa ka sorkar MDA toh kawa em boon ki Party wa ki MLA samen kamtæ da em thaw du uwi u Montri na ka BJP wei nadooh wa sdang leh mynjur u wow man Montri chwa da u AL Hek ar snem chiteiñ.
Deiwa pynrap wa boi i wan u Amit Shah da yarap ko ya oo deiwa tip u wa em kam kani ka mynjur wow yabhah ya ka chuki montri.
Da pynsñiaw u leh yei sñiawkaam wei sñiawngooh ya u Montri Rangbah, u Conrad Sangma uwa da e ha oo ki chnat sorkar wow pait deiwa pynrap leh wa chi snem chiteiñ man ko iwa biang wow kreh neibynta ki paidbah.
