Shillong: Ka sorkar jylla ka da rai ko wow pynkrehkaam pura ya ka Megha Health Insurance Scheme (MHIS) neibynta waroh kiwa kjut ha ki Hospital ka jylla.
Kani ka rai ka sorkar toh hadien wa da pynbna wow booh kyrpang ya ki ar tylli ki Civil Hospital du neibynta wow sumaar lada em kiwa yoh ya u khniang COVID-19.
Neiliang u montri ka chnat i chait i khiah, u Alexander Laloo Hek da ong u wa ya kani ka rai da chim ha ka yalang ynne ka sngi wa da emlang kiwa pynlai ki thaw sumaar ki bru samen.
U Hek da pyntip u leh wa kani ka rai u kynthup ko leh ya kitu kiwa ympu em u pynpsiah pyrtuid ha ka MHIS wei kamjooh leh ya waroh kiwa kjut kiwa em ha ka jylla.
Da ong u leh wa lada em kiwa yoh COVID-19, ka sorkar daw pynlut ko ya ka bai sumaar.
Da ong u leh wa kani ka rai ym mut ko wow kyrriah ya waroh kiwa kjut na Civil Hospital, tangwa lada emkaam ha iwon iwon i por ka sorkar daw leh ko yeiwa emkaam.
Da pyntip u leh wa hadooh ynne ka sngi da booh ar tylli ki thaw sumaar COVID-19 ha Shillong, kawi ha Civil Hospital kawa da pynkhreh 200 pyllong, kawi won ha Cancer Wing kawa em 40 tylli ki pyllong, katwa ha Garo Hills da pynkhreh kamwa 100 pyllong neibynta wow sumaar ya kiwa yoh khñiang ha Tura Civil Hospital.
Discussion about this post