U MLA ka Liang Pyrchah uwa man leh u President ka Voice of the People Party (VPP), u Ardent M Basaïawmoit da ong u wa lada ka sorkar sñiaw ko wa emkaam palat wow wanrah ya ka luti rel, ye ko wow lai chakhmat, wei ym emkaam wow chna ya ka Committee neibhah wa ka VPP dadep klam che ko hajrong ini i bynta.
Hawa pynskem yei wym bien u embynta ha ka All Party Committee (APC) kawa da chna da ka sorkar yow yasyllok hawa yatoh wa i wanrah luti rel ha ka jylla, u Ardent da ong u wa ka seiñ dadep ko wow sñiawthooh chwa yei sur ki paidbah hajrong ini i bynta, wei kawi won toh neidaw wa ka VPP da jooh klam ko ya kani ka phang wot hapoh ka yung dorbar chna aiñ leh.
Kam wow kdaw heini ka Voice of the People Party (VPP) ha u bnai wa dep da pynbna ko wym bien u lai chimbynta ha ka All Party Committee (APC) yow yaklam heiyatoh wow pynyabi luti rel ha ka thaaiñ ka Khasi wa Jaiñtia Hills, deiwa ong wa emkaam wow wanrah chwa ki aiñ wow yada nei wan psiah ki bru kiwa na baar jylla kam ka Inner Line Permit (ILP).
Ka VPP da ong ko leh wa kani ka Committee toh du wow pynsepai yei por wei ka ym bien ko wow chimbynta.
Hadien wa kyntait ka VPP, sa ka Meghalaya Pradesh Congress Committee (MPCC), ha ka tayaaw wa dadep da pynbna ko wym bien u embynta ha ka APC, deiwa pynsñiaw wa ka sorkar ym em chna ko ya ka All Party Committee na ki bynta kiwa boon ki kaam wa kongsan wa yatoh ha ka jylla, tangwa da rai ko du samen.
Discussion about this post