Ka Ladrymbai “B” Sports Club da e jubab ko yeiwa pynche ka East Jaintia District Cricket Association (EJDCA) deiwa ong wa kwah ki wow tlep yei wym ye ka Association wow pynman yei yalehke deiwa khooid.
Da ong wa katkam wa ong ka EJDCA wa ya ka Rule 16 wa Rule 17 ym em tyngkheiñ ka da ka Dienchynrum Sports Club wei lada kamtæ da dawa na ka EJDCA wow pynyoo ko ha ki laad pathai khubor ya kini ki Rules wei wow batai che kammon kreh ki wei kammon da pynkrehkaam ki neibhah ki Club deilang ki paidbah em hok ki wow tip.
Da kdaw leh wa ha ka Meeting wa da pynman ha ka 8 tarik uni u bnai deiwa emlang waroh ar ki Team, tangwa ka Ladrymbai “B” Sports Club ym pu em yoh ko dei thoh ya ki “Official Minutes”, i thaw wa pynman kamjooh i jubab iwa dei thoh. Kamtæ da kylli na ka EJDCA heiwon da pynman ya kani ka Meeting, uyi wa da soi pyrtuid ya ka Minutes wei lada ini toh iwa leh deiwa khooid ileh da murieh ya kini ki kot ki sla?
Ka Ladrymbai “B” Sports Club da ong ko leh wa ya ka Final ka District League 2026 da pynman deiwa murieh ha Ri-Bhoi ha ka 26 tarik hapyrdi ka Dienchynrum SC wa ka Lumshnong Block CA. Wei ini toh deiwa pynman yabor khlem da ye wow pynbait ya ka ujor. Da kylli leh wa iyi i daw wa ya ka East Jaintia Hills District League Final da rah cha kawi ka District? Wei lada toh ka Tournament man ko kawa lai bait ileh yut ka EJDCA cha Ri-Bhoi kam kiwa tooh? Ini da pyndooh ko yei chaniah kiwa boon ki khynroo kiwa yaleh Cricket wa em hapoh ka District.
Da kdaw leh wa hei pynche ka EJDCA da ong ko wym em leh chiliang, kamtæ da kylli wa lada ym em leh chiliang ileh wym e jubab ka EJDCA da ka hi cha ka Ladrymbai “B” Sports Club. Ya kani ka jooh ka kaam da thoh leh cha u DC ka East Jaiñtia Hills wa cha ka Meghalaya Cricket Association.
Da ong leh wa ki kam ka Ladrymbai “B” Sports Club, da dooh ki waroh i kyrmen hei rukom krehkaam kiwa ksohkaam ka EJDCA kattæ neibhah man ki kiwa leh chiliang wei ym em khooid i kaam wa leh ki.
Kamtæ da rai wow Boycott ya waroh ki Tournament wa kiwi de kiwa pynman da ka EJDCA kat dang em da ki dkhot Committee kiwa kattæ.
Da kyntu leh ya waroh ki Cricket Club ka East Jaiñtia Hills wow yatylli ki wow yakhih wei wow Boycott ya kani ka Association kat wym pu yoh yei hok.
Da dawa leh wa yow yoh biang i chaniah ya ka EJDCA, u President, u Secretary wa waroh ki Official wa embynta wow pynman ya kani ka Tournament wym em khooid wow hiar chuki noh ki.
“Ka EJDCA ym ye ko wow ong wa em i mynsien yaleh Cricket hawa tang kam ini i kaam wa suk leh ym ye wow pynbait wei ym ye ko leh tang wow pynman ya ka Final pyn hapoh ka District hi ko”, pynkut ka kyrwoh na ka Ladrymbai “B” Sports Club.
Discussion about this post