U HDR Lyngdoh uwa man u MLA wa u Montri warim ka jylla da ong u wa i long i man hawa kyruiñ cha ka synchaar khaddar hapoh kani ka sorkar ym toh kawa bha, wei waroh tip ki wei yoo lut ki ya iyi ka synchaar kawa lai wei wa da leh ha kini ki soo snem chiteiñ, kawa kat chawa kyruiñ sa du i duna suda.
Da ong u wa najrong i man i long yong ka synchaar leh wym miat, i rukom synchaar yong ka seiñ wa yahkhmat ya kani ka sorkar da che wa ka rukom krehkaam u man ko pyrchah ya ki paidbah namo kawa man ‘Anti People’, tangwa neiliang kiwa yahkhmat won da ya chongchit ki du para ki ym toh ki paidbah.
Da ong u wa ki paidbah man kiwa chynna jngai wei waroh ki tip lut ki yei rukom krehkaam yong ka seiñ kawa yahkhmat ya ka sorkar.
Hawa kylli won iyi wow ong u hawa ka UDP leh toh ka seiñ wa ya krehlang ha kani ka sorkar, da ong u wa hao ka UDP ka yakrehlang ko ha kani ka sorkar, tangwa man du kam ka seiñ chah yahlang wei hawa em iwon iwon i eh wa i duna lane ki wym biang, kam ka seiñ kawa yahkhmat ya ka sorkar toh u chim ko yei kitkhlieh.
Hawa kylli won wa kam uwi na kiwa yahkhmat wa da ih bha ha ka saiñ pyrthai wei uwa embynta ha kiwa boon ki sorkar, wa iyi wa phær ha ka rukom krehkaam yong kani ka sorkar MDA wa da yahkhmat da ka NPP wa ki sorkar warim kiwa da embynta u, u HDR da ong u wa lada u ong u wa rap bha ka sorkar wa yahkhmat da ka Congress kawa oo embynta u, da man thij kamwa yaroh ya idæ, kamtæ u ieh ha ki paidbah wow bichaar wei wow nujor ki yei rukom krehkaam yong kani ka sorkar wa ki sorkar kiwa da lai.
Puræ leh: Psiah u HDR Lyngdoh deilang wa kiwa kyrchaan cha ka UDP
