Lada pyndam ya ki mukotduma pyrchah yaka HNLC kammon u yoh kitu kiwa chah ktah yei bichaar wa hok: BJP

Ka Bharatiya Janata Party (BJP) Meghalaya da kyntu ko yaka seiñ kieñ tiar ka Hynniewtrep National Liberation Council (HNLC) wow pynkylla yei rai wa da pynbna wow mih noh nei yaklam yasuk waka sorkar pyrdi deilang waka sorkar jylla.

Hawa klam cha ki laad pathai khubor, u National Vice President ka BJP wa pait ya ka Meghalaya, u C Chuba Ao da ong uwa kam ka Party da kyrpaad ko ya ka HNLC wow wan ki chakhmat yow imlang noh haka imlang sahlang yow yoh yei suk.

U President ka BJP Meghalaya, u Rikman G Momin da ong u wa ka jylla ka emkaam ko yei suk wei ka BJP ka kyrpaad ko yaka HNLC wow wan chakhmat yow yoh yei yaklam yasuk waka sorkar jylla deilang waka sorkar pyrdi.

Ha iwi won i liang, uwa e ktien ka BJP uba man leh u pulit IPS wa da chong-ngiah, u Mariahom Kharkrang da ong u wa ka Party da khyrngiat ko hajrong i rai wa syndet syndet yong ka HNLC wow mih noh nei yaklam yasuk waka sorkar. Da ong u leh wa ym man iwa suk yaka sorkar wow pyndam lut ya waroh ki mukotduma pyrchah ya kiwa yahkhmat wa ki dkhot ka seiñ.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da ong u wa kamwa da yoo, iwa hakhmat dooh iwa dawa ka HNLC toh yow pyndam noh ya waroh ki mukotduma pyrchah ya kiwa yahkhmat wa ki ki dkhot yong ka, wei pynrap u wa kiwa yahkhmat ka HNLC toh u yang chwa ko neibhah ym man iwa suk yaka sorkar wow pyndam noh ya ki mukotduma khamtam lada toh kiwa da Charge Sheet wei kiwa em hapoh ka yung bichaar, neibhah chisien wa da Charge Sheet da chong ha ka yung bichaar.

Da ong u leh wa hap wow pyrkhat ya kitu kiwa da chah ktah na ki kaam ka HNLC, kiwa ye u man kiwa ha-yung ha-sem yong kiwon kiwon wei katni lada ka sorkar ka pynsñiawbha ko du chiliang deiwa pyndam ya waroh ki mukotduma, kammon u e yei bichaar wa hok cha kitu kiwa chah ktah ha ki kaam wym man ka HNLC.

U Kharkrang da ong u wa i rai yong ka HNLC wow pyndam noh yei yaklam yasuk toh i rai iwa jhan deiwa pynrap toh u e laad chwa yei yaklam yasuk u lai ko.

Hawa kylli, uni u heh pulit warim da ban biang u deiwa kyntu yaka HNLC wow pteiñ chwa yei yaklam yasuk, deiwa ong leh wa ha kam ini i bynta toh deiwa e wei deiwa ya chim wei ka ka HNLC ym ye ko wow dawa wei yooluti wow pynkrehkaam ya waroh iwa dawa.