U MLA warim ka Umroi, u Ngaitlang Dhar da ong u wa hadien wa da sdang u wow yarap ya ki paidbah ha katai ka Constituency da em kiwa thmu wow pynsih yei pyrtuid wei wow pynbaad wa u Ngaitlang wa u Dasakhiat toh kiwa mahajon kiwa ye u e ya ki paidbah katwa kwah ki tangwa da pynrap u wa lada mahajon katwa mahajon leh lada ym em i mynsien ym toh iwa suk wow e yarap ya kiwi leh.
Da ong u wa i kreh yong oo wa ka yung ka sem ha Nongkrem Constituency ha ini i chi snem ym toh wow thied ya ki paidbah kamwa da pynbaad da ki kyrtong wa yaleh pyrchah ha ka Election, tangwa i lai wow yakhun na Nongkrem toh hadien wa da yasyllok wei da yachem wa kiwa yahkhmat na katai ka Constituency kiwa da pynsñiaw yei eh wa da maad ki iwa da pynman ya oo wa ka yung ka sem wow pyrchang wow yarap katwa ye.
Hawa klam ha ka yalang ha Nongkrem, u Ngaitlang da ong u wa lada ki paidbah jied ki ya u Dasakhiat uwa man u khon yong oo kam u MLA ka Nongkrem, oo daw man u kam u MLA wa ar wow kit wow bahlang yeiwa emkaam ki paidbah katai ka Constituency.
U Ngaitlang da ong u wa ki paidbah lada pynman MLA ki ya u Dasakhiat wei lada ym yoh wow yachem wa u MLA ye ki wow yachem wa oo kam u pa hawa emkaam ki yei yarap lane hawa chem chitom ki.
Ha kani ka yalang wa da emlang leh u Sniawbhalang Dhar uwa man u MLA ka Nartiang da ong u wa ka yung yong ki Dhar toh ka yung kawa yarap ya ki paidbah ym toh kawa paan na ki paidbah. Da ong u wa lada u Dasakhiat u jop u, ki paidbah ka Nongkrem daw man ki kiwa embhah bha, neibhah man kamwa thied that ka wi tæ yoh mynkna won 3 tylli. Da ong u wa u Ngaitlang u man u kam u MLA wa ar, katwa oo won kam u Montri wa da rangbah daw pynmankaam u ya iyi wa u Dasakhiat ym ye u.
