Shillong: Ka Confederation of Meghalaya Social Organisation (COMSO) ynne ka sngi da lai thooh yutip ko na ka sorkar hajrong i slem ka High Level Committee wow kyrriah noh ya ki Khar Mator na Sweeper’s Colony, Them Iewmawlong.
U Robertjune Kharjahrin uwa man u Chairman ka COMSO da ong u wa hadien wa pynmih hukum yong ka Meghalaya High Court wa ki Khar Mator toh u krehlang ki wa ka sorkar wow pynsakhiat yei man ki kiwa chong chnong ha katai ka thaw, heiwa ka sorkar lyngba ka High Level Committee (HLC) da e por biang ko sa 30 sngi wow leh ya ini.
Da ong u ini i pynslem wow kyrriah ya kitai ki bru da pyndooh kyrmen ko ya ki paidbah, khamtam i wan tuklar yong kiwi ki jaitbru wa na baar hajrong kani ka kaam kawa man kam wow e diñ ya ki tre chnong.
Da pyntip u leh wa neiliang ka seiñ da klam che ko hakhmat u symbood montri rangbah uwa man leh u Chairman ka HLC, u Prestone Tynsong wa lada ka sorkar ka dang pynslem ko wow pteiñ u e por ya kani ka kaam ye wow mih biang i yakhih pyrchah wa ka kynrum kynram kawa ye u ktah ya ka chong suk chong saiñ.
Discussion about this post