U President ka National People’s Party (NPP), u Conrad K Sangma uwa man leh u Montri Rangbah ka jylla da pynsñiaw u yei sñiawngooh ya ka United Democratic Party kawa da rai wow kyrchaan ya u kyrtong ka NPP ha ka Election chiteiñ samoi na Mawryngkneng. Da ong u wa lada toh wym em kyrtong ka NPP na Mawphlang, da kyrchaan lang ya u kyrtong yong ka UDP.
Da pyntip u leh wa da dep klam che wa ki seiñ kiwa emlang hapoh ka MDA wa kam ka sorkar synrop daw burom markylliang wei u yarap leh markylliang lada ye ha ka Election chiteiñ samoi.
Da ong u wa lada em ki thaw wa ki Party wa emlang ha ka sorkar kwah ki wow yakhun ya ka Election, ka NPP ym tuklar lada ki pynyieñ kyrtong ki, deiwa pynrap leh wa neibynta ka Mawryngkneng, ka UDP da rai ko wym pynyieñ ya u kyrtong, tangwa daw kyrchaan ya ka NPP, wei lada toh wa ka NPP leh ym booh kyrtong ko ha Mawphlang, da kyrchaan bait ya u kyrtong ka UDP, tangwa hadien wa da paan Ticket u MDC, u Lamphrang Blah; ka NPP da pyntip lang ko cha ki seiñ kiwa synrop ha ka sorkar MDA.
Heijooh i por u Conrad da ong u wa hadien wa da pyntip, neiliang ki seiñ saiñpyrthai wa em ha ka sorkar synrop, da pynsñiaw ki wa kiwon kiwon ki seiñ kiwa ye, ye ki u sai ya ki kyrtong lada kwah ki, neibhah em ki yei hok wow kreh neibynta i myntoi ka Party, wei heijooh i por wow kreh leh neibynta i myntoi ha ka sorkar wa em ki.
