Lada ye wow e 20,000 sien i tika chi sngi, pyn ha u Naikhynde da yoh tika lut: Conrad

Ha ka yalang wa pynman da u Montri Rangbahdooh ka ri u Narendra Modi wa ki Montri Rangbah ki jylla ka thaaiñ mihsngi ka ri yow yaklam heiyatoh wa i long i man ka khlam ha ka thaaiñ kawa da embynta lang wa u Montri ki Kaam Pohyung ka ri u Amit Shah wa u Montri i Chait i Khiah u Mansukh Mandaviya da booddien yei yaleh pyrchah ya ka khlam.

Hadien kani ka yalang, neiliang u Montri Rangbah ka jylla u Conrad Sangma da pyntip u wa ha kani ka yalang wa pynman lyngba ka Video Conference kawa jrong ar kynta da yaklam yei katwon i boon (Positivity Rate) ki bru wa yoh ya u khñiang khlam, i e tika wa kiwi kiwi de kiwa yatoh wa u COVID-19.

U Conrad da pyntip u wa neiliang yong oo da khana u wa kamwa da yoo nachwa, wa ka khlam poi ko cha ka thaaiñ Northeast hadien wa da dep ko na kiwi ki bynta ka ri kamtæ da man ko kamwa da antaad hi iwa da e por ko leh ya i wow pynkhreh i wow pynbiang ya ki thaw pynmih Oxygen wa kiwi kiwi de.

Da ong u leh kamwa man kattæ da sdang wow duna kiwa chah ktah ha ka khlam tangwa ym em duna ki kamwa da yooluti iwa ye u man leh neidaw ki thaw wa em cha kdong cha chmiang heiwa ha ki thaw wa em boon ki bru da yoo yei ku syndet kiwa da hiar won katni tangwa ha ki thaw nongkyndong da chem chimpor wow duna i poor ka khlam. Heijooh i por da ong u wa da yooluti wa ha kini ki tayaw wow wan daw man chngaaiñ i long i man heiwa ka Positivity Rate leh da hiar ko hapoh 10% hapoh ka jylla lait noh ki ar tylli ki District kiwa em palat 10%.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

“Iwa sñiawkhia dooh kattæ toh i e tika hapoh ka jylla iwa duna bha hawa kheiñ kyllum lang namo ka Average yong ka ri wei ya ini da pyrchang wow pynphet chakhmat deiwa phah ya ki MLA, ki MDC wei da paan yarap leh na kiwa yahkhmat niam wa ki waheh chnong wa kiwi kiwi de wow yarap u pynkhlan yei e tika wei ini da sdang mih soh i ha kini ki sngi,”da ong u Conrad.

Chooh chooh da ong u wa lada ye wow e 20,000 hadooh 25,000 sien i tika ha chi sngi, daw ye wow pynyoh tika ya waroh kiwa da toh hok wow yoh ha u Naikhynde lane hawa sdang u Naichiphaw.

Kam wow pynkynmoo wa ha uni u bnai da ye wow e ym duna 10,000 chi sngi.

Da e khublei u leh ya ka sorkar India kawa da e dei mynkna ya i tika cha ki paidbah wei kawa da yarap leh wow pynyoh ya ki Oxygen Plant heiwa daw yoh waroh 14 tylli.