Heiyatoh wa da em biang i jia wa sñiawsih ha i thaw tih mooyong ha East Jaiñtia Hills heiwa da em kamwa 5 ngut kiwa tih mooyong kiwa sahkut hapoh iwi i krem mooyong hadien wa chlai um i wei ym pu em chem ya ki hadooh kattæ, neiliang uwa yahkhmat ka liang pyrchah u Dr. Mukul Sangma hawa wan u cha Jowai ynne ka sngi yow lai pait ya ki thaw sumaar kiwa yatoh wa u COVID-19, da ong u wa da dep wow dooh ya ki mynsien wa kordor na kam ini i jia neidaw wa tih marpohkhyndaw, wei neiliang ka liang pyrchah da yaleh ko wow pynbor ya ka sorkar wow sympat wei wow pynkhor yow khang yei tih marpohkhyndaw wa man pyrchah ya ka aiñ.
U Dr. Mukul da ong u wa neiliang ka sorkar ka kyntait wei ym bien ko wow pdiang wa em ini i tih wa man pyrchah ya ka aiñ wei ini iwa dang jia pynyoo che ko wa i tih mooyong pyrchah ya ka aiñ toh iwa dang lai chakhmat wei na ini da mih leh kiwi ki jait kaam wa man pyrchah ya ka aiñ nadooh i kit tooh, i dai tooh, i khayi tooh wei heijooh i por da pynkylla dur ko ya rymaw da kini ki kaam pyrchah aiñ iwa ktah ya ka imlang sahlang, iwa ktah ya ka jylla i wym toh iwa miat ya ka sorkar kamtæ toh u pyndooh noh ya ini.
“Kini ki kaam pyrchah aiñ kiwa heh hadooh kat deini ymtoh u chah wow jia i wei ym ye i wow jia lada ym emkti lang ki bru wa em hei bor, neibhah ini i tih mooyong ym toh iwa leh du da kawi ka belcha, uwi u wakhu wa tih ha kiwa khian wa khian ki thaw wei ini i tih mooyong toh iwa pynemkaam da ki kor wa heh, wei lada pait ya iwi won iwa jia ini wa dep heiwa ka Crane da haap da oor ko, kamtæ kammon wym yoo ki bru wa em hei bor ya ini i rukom tih mooyong?” da kylli u Dr. Mukul.
Da ong u leh ka jylla yong i ym toh kawa heh wei da pynmih boon tylli ki District yow ye u pait bniah heiwa katni da em ka East wa West Jaiñtia yow em boon ki bru wakreh iwa mut da boon ki khmat wa pait wa ki chkoor wa ap, tangwa lada ka sorkar wa katni jied ko wow chah ya kini ki kaam pyrchah aiñ u pteiñ ki, kiyi won wow ye u khang ki.
Chooh chooh da ong u leh wa i tih marpohkhyndaw pyrchah ya ka aiñ man ko thij kamwa lute ya ka jylla, deiwa kylli u cheiwon lai kini ki mar wei ka sorkar leh ym em yoh poisa ko na ini neibhah ka poisa wa yoh lyngba ka Royalty lai ko leh cha ki District Council heiwa kamwa man katni ki District Council ym ye ki wow leh yei kaam wa toh u leh ki katkam wa da pynkit ha ki da ka riti synchaar ka ri.
Da pynkut u deiwa ong wa da toh u booh ya ka takit ka laitlooid ha ki jar jiar ki District, ym toh deiwa leh kyllum lang ya waroh kawi ka jylla wei daw pyntikna u wa daw leh ya ini yow lait kitu kiwa emkti khlem da chah pynchitom.
