I long i man ha West Garo Hills ym pu em jai-jai i wot hadien wa da pynkrehkaam da ka Curfew wei da pynjoor ya ki bor pulit heiwa i kynaad da man i dei yong jaitbru neidaw ka Election cha ka GHADC.
Hawa pdiang yeini i long i man ha katai ka thaaiñ wym pu em chngaaiñ, u Commissioner & Secretary ka jylla uwa pait ya ka chnat DCA, u Cyril Diengdoh, da ong u wa ki bor pynlai District da pynkrehkaam biang ki ya ka Curfew ha ka 11 wa 12 tarik uni u bnai wei da phah chooh chooh ki bor ka aiñ cha katai ka thaw wa joor i kynaad yow tem ya iwon iwon iwa jia.
Da khana u wa da pynemkaam leh ya ki Central Reserve Police Force (CRPF) kiwa dapoi ha Tura wei da phah leh cha ki thaw wa rap joor i kynaad yow pynneh ya ka aiñ. Da pyntip leh wa neiliang ki chipai Indian Army ynne ka sngi da lai pynman ki ya ka Flag March ha kiwa boon ki thaw wa kynhup ha Chibinang, Rajabala wa kiwi kiwi yow wanrah biang yei chong chngaaiñ ya ki paidbah.
U Cyril da pyntip u leh wa ki bor wa em haneiñ da phah ya ki Deputy Commissioner ha waroh kawi ka thaaiñ wow pynman yei yaklam wa ki kynhun Balang, kiwa yahkhmat chnong wa kiwi de wow em ki hapoh ka Peace Committee.
Da ong u wa i long i man da pyntkoh ko yei thap pyrtuid ki kyrtong MDC ha West Garo Hills, tangwa da pyntip u wa ha kiwi ki District ki kyrtong da lai ki wow thap pyrtuid.
Hawa kylli hajrong wa em kiwa dawa wow pynsangeh chwa chipor ya ka Election MDC, uni u heh sorkar da ong u wa kamwa man kattæ ka Election u lai bait ko kamwa da pynbna, wei da ong u wa ka sorkar daw pait ko yei long i man ha kini ki kajiak sngi wei heijooh i por da chim ya ka laad wow wanrah biang yei chong suk chong chngaaiñ.
Hawa kylli chooh chooh, u Cyril da khana u wa hadooh kattæ da em ar ngut ki bru wa da yap na ini i kynaad wei neiliang ka sorkar dang yang chooh chooh ko yeiwa pyntip na ki bor District hajrong i yap bru wa kiwa chah kem.
Discussion about this post