Jowai: Ynne ka sngi kawa man ka sngi thap vote ha ka Bye-Election ha Ranikor wa ha South Tura Constituency,wei neiliang u FR Kharkongor uwa man kam u Chief Electoral Officer (CEO) ka jylla ka jylla da pyntip u wa ka thap Vote ha kini ki ar Constituency da man ki kiwa lai bait khlem iwon iwon i thut.
Da ong u leh wa hadooh 5 waje i janmiet, da wanpoi kiwa thap Vote hadooh 82.81 % ha Ranikor, 72.89 % ha South Tura wei ini i wan thap Vote ye i u ku neibhah wa dang em ki thaw kiwa ympu yoh yukheiñ hadooh 5 waje janmiet khamtam kiwa haap ha Ranikor Constituency heiwa boon ki thaw wa haap lai dei kjat.
Chooh chooh da pyntip u wa em 3 tylli ki kor wa thut ha ki thaw thap Vote ha Ranikor wa 4 tylli ha South Tura tangwa da ye u pynbait ya ki deiwa kylliang noh ya ki.
Ha Ranikor ka tnat Election da haap pynemkaam ko da kiwa phet wow rah khubor na kawi ka thaw cha kawi tawon ya kiwa da thung kam ki Volunteer yong kani ka Election ya kiwa da su da ka yung krehkaam Deputy Commissioner, Mawkyrwat ka South West Khasi Hills.
Ka Ranikor da em hadooh 65 tylli ki thaw thap Vote namo ki Polling Station wei 29,685 ngut kiwa thap wa kynthup ya 15,183 ngut ki chynrang wa 14,487 ngut ki kynthai katwa ha South Tura won em 36 tylli ki Polling Station heiwa em hadooh 30,231 ngut kiwa thap Vote, wa kynthup ya ki 14,846 ngut ki chynrang wa 15,351 ki kynthai, 33 ngut ki sSrvice Voter wa uwi u NRI Voter.
Ya ka Vote na kini ki ar Constituency daw ñiaw ha ka 27 tarik uni u bnai.
Neiliang u CEO da pyntip u leh wa da yoh ujor na ki bru pyrchah ya u khon u kyrtong ka NPP na Ranikor u Martin M Danggo neidaw walai psiah u ha yung bru ynnin i miey ha chnong Phudkroh kawa man ka chnong u Danggo.
Ha ini da jan mih i awri awra iwa da pynman ya ki pulit wow lai wut wut cha kani ka thaw wow khanglaad ya iwon iwon i awri. Uni u khon u Danggo toh uwa kreh ha ka tnat Excise ka sorkar jylla wei u CEO da pyntip u wa ki pulit daw takit ki wow chem yeiwa sakhiat hajrong ini i jia waroh.
Discussion about this post