Ka seiñ ki tre Truck wa kiwa yah Truck wa em hapoh ka lama yong ka Meghalaya Commercial Truck Owners and Drivers Association (MCTODA), ynne ka sngi da lai ki chakhmat yei yakhih wa khlem booh por ha u sarok Jowai Bypass ha Soomer Mihmyntdu deiwa pynuiñ ya ki kari kit Cement wa Clinker kiwa wan na thaaiñ East Jaiñtia Hills District.
Kani ka yakhih yong ki toh hajrong ka yurim wa ki karkhana pynmih khyndaw bilat wa em ha ri-loom Jaiñtia ym bien ki u su bai kit katkam i dor sorkar.
Heiyatoh wa kani ka yakhih kawa da dep pynbna chwa ki, neiliang u DC ka West Jaiñtia Hills leh dadep phah u dei thoh cha ki ha ka 24 tarik heiwa da khang pyrchah u ya ki wym hoi u pynman yakhih ki, tangwa ka seiñ won da chim bait ko ya ka rai ha ka 25 tarik wow lai bait chakhmat yei yakhih neibhah wa yakhih ki yow dawa yei u ya imlang.
Kamtæ ynne ka sngi kawa man ka sngi sdang i yakhih, neiliang ki bor pulit ka West Jaiñtia Hills District leh da ya hiar ki ha kani ka thaw wei u Magistrate ka District, u F. Passah leh da wan poi u yow pyrchang yaklam pynsñiawthooh ya ki dkhot wa yahkhmat ka seiñ.
Tangwa neiliang ka MCTODA won da chim ki ya ka rai wow pteiñ chwa bait yei yakhih deiwa man kiwa pynkhreh u chah kem.
Wei ong haroh ki wa da ngiah ki u lai chi lai yaklam wa u DC ka East Jaiñtia Hills District neibhah da boonsien jooh lai ki leh ym em man kaam i dawa yong ki.
Neiliang kiwa yahkhmat MCTODA Jaiñtia Unit ha kani ka sngi da pynsñiaw biang ki ya ka chithi kawa yoh ki na u DC ka West Jaiñtia ha ka 24 tarik.
Kani ka yakhih hadooh i por chiteiñ sngi dang lai bait ko, wei dang yang haroh ki ya kiwa yahkhmat ka Central Body wow poi hei janmiet neibynta u ya pyrkhat chooh chooh hajrong kani ka yakhih.
Discussion about this post