U Sadon Blah uwa man u ksiang neiliang ka Hynniewtrep National Liberation Council (HNLC) wow klam yasuk wa ka sorkar, da ong u wa hadooh katni ympu booh ya ki mat (Agenda) hei yaklam yasuk ka HNLC wa ka sorkar jylla wa ka sorkar India, tangwa da pyntip u wa ka Instrument of Accession (IOA) u man ko kawi na ki mat wa ka HNLC u booh ko.
Da ong u wa i yaklam ymye ko wow man khlem ki kyndon, neibhah em ki mat wa ka HNLC yieñ ki ha ki palat 35 snem wa da lai, wei ka Instrument of Acession (IOA) toh kawi na kini ki bynta klam yasuk.
Da ong u wa hadooh katni ympu em ki mat yaklam wa ka sorkar ya kiwon kiwon ki mat, tangwa da em kiwi ki yaklam wa lai chakhmat ha ini i kaam, wei da pynrap u em ki kynjnit kynjnat kiwa emkaam wow pynbait wa ka sorkar pyrdi.
U Sadon da ong u wa ka luti yaklam yasuk hapyrdi ki ar sorkar wa ka HNLC da man iwa lai bait khlem em i thut lait nei sangeh chipor neidaw ka Election.
