Jowai: Ka Dorbar Tlang wa ar sngi yong ka JHADC kawa da sdang ynne ka sngi da man ko kawa lai bait heiwa da sdang ya ka da ka kynta kylli yutip namo ka ‘Question & Replies’ heiwa ki MDC da paan yutip ki chaphang ki kattu katni ki kaam yong ka JHADC.
Nyngkong u MDC ka liang pyrchah u Marki Mulieh da kylli u chaphang ki Trading License wa thymme wa da e ha Jowai wa ha Lad Rymbai heiwa neiliang u WG Sungoh da jubab u deiwa ong ha ha Jowai ym em u e kawi wot leh katwa ha Ladrymbai won da e 26 tylli ki License wa thymme.
Hei yatoh wa i por wa da booh hei wow pyndep ya ka Dorbar Hall wa ka Court Building wa kylli u Marki, neiliang u Holando Lamin da ong u wa da booh thong hapoh 30 bnai nadooh u Duyatra (January) 2014 tangwa neidaw wa duna i yoh poisa da slem u pyndep ya ka Dorbar Hall katwa ya ka Court Building won daw pyndep noh hapoh u Kmaichonglad (December) 2018.
Neiliang won u MDC ka Khliehtyrchi, u MB Rymbai da kylli u wa katwon ngut em kiwa kreh hapoh ka JHADC, heiwa u CEM ka Council u Andrew Shullai da pyntip u wa em hadooh 1290 ngut katkam wa man katni, yeiwa u Rymbai da kylli u wa lada ini man i palat yeiwa da booh (Over Staff), u Andrew da jubab u deiwa ong wa ya kini da thung katkam ka mang poisa (Budget Allocation) ka Council manla u snem.
U Rymbai da kylli u leh wa la katwon tylli ki Trading License wa da e ka Council nadooh u Naichiphaw 2017 hadooh katni, heiwa u WG Sungoh da jubab u deiwa ong wa hadooh katni da e 28 tylli ki Trading License.
Kiwi ki phang kiwa da kylli u Rymbai toh chaphang ki Land Holding Certificate, ki Patta wa kiwi kiwi.
Hadien kani ka bynta da kynmoo warom leh ya ar ngut ki MDC warim ka Council kiwa da khlaad na kani ka pyrthai kiwa kynthup ya u (T) H. Suchiang wa u (T) K. Sahneh Rymbai heiwa da yieñ ki MDC waroh wow suki chipor kam ka dak wow kynmoo warom ya ki.
Ha kani ka Dorbar da wanrah leh ya ka aiñ The Jaiñtia Hills Autonomous District (Election and Tenure of the Office of Sirdar of Sumer Elaka) Rules, 2018.
Discussion about this post