Ka seiñ Jaiñtia Students’ Movement (JSM) ynne ka sngi da lai booddien ko yei dawa Government College ha East Jaiñtia Hills District deiwa e dei thoh cha u Education Minister ka jylla, u Rakkam A Sangma lyngba u DC ka East Jaiñtia Hills District.
I booddien ka JSM lyngba u DC toh ha ka yurim wa katkam ka khubor wa da mih na ka sorkar jylla ha ka 24-01-25, heiwa ka sorkar da pyntip ko wa daw chna ya ar tylli ki Government College kawi ha West Khasi Hills District wei kawi won ha East Jaiñtia Hills District.
Kam wow pynkynmoo wa ka JSM nadooh u snem 2015 ter ter hadooh katni dang pteiñ ko wow dawa na ka sorkar wow e ya ka Government College ha East Jaiñtia Hills District deiwa dep phah ya chiboon ki chithi cha ka sorkar jylla kamjooh leh deiwa pynman ya chiboon ki yakhih u dawa na ka sorkar.
Ha ka 14-09-23, ka seiñ da yachem wa u Deputy Chief Minister ka jylla, u Sniawbhalang Dhar hajrong i dawa kamjooh da e dorkhat cha u Chief Minister ka jylla kamjooh cha u Minister ka chnat Education.
Ka yurim wa ka JSM da dawa ko ya kani ka College toh neidaw wa ha waroh kawi ka Jaiñtia Hills em du kawi donhi ka Government College iwa da wanrah yei eh i khoo ya ki khynroo khyllood wa lai puræ neidaw wa da khynnia ki kamra hadooh wa da jynjar u yoh Admission neidaw wa joor boon kiwa yaknieh wow yoh laad u pteiñ yei lai puræ ki.
Kamtæ yow ye u pyndooh yeini i eh, ka seiñ da pynsñiaw ko wa smat ko wow ya krehlang wa ki bor sorkar deiwa e buit wow pynyoh ya ka Government College.
Neiliang u DC da ong u wa ka sorkar jylla da em ko i thmu wow pynyoh ya kani ka College ha East Jaiñtia Hills tangwa ye ko u chimpor neibhah hap pynbiang ya chiboon iwa emkaam.
Kamtæ ka JSM da ong ko wym chong kli kti ko, tangwa daw lai booddien ko hadooh u yoh yei dawa neibynta u pynsuk ya kiwa lai puræ puthi yong ka thaaiñ East Jaintia Hills hi waroh kawi.
Puræ leh: U sdang ka sorkar ya ki Degree College ha East Jaiñtia wa West Khasi Hills
Discussion about this post