Ka Voice of the People Party (VPP), hapoh i yahkhmat u Ardent M Basaiawmoit da lai yachem ki wa u Montri Rangbah ka jylla, u Conrad K Sangma yow booddien hajrong i dawa wow pynbait thymme ya ka Reservation Policy.
Hawa klam wa ki laad pathai khubor, u President ka VPP, da khana u wa u Montri Rangbah da pyntip u wa da dep wow yoh ya ki dkhot ka Expert Committee, wei kawa dang sah toh wow yoh ya u Chairman, wei da pyntip chooh chooh u wa ka sorkar ym chimpor de ko wow pynbna ya ki dkhot hapoh ka Expert Committee.
Hawa kylli yei wanrah da ki stat kiwa na baar ka jylla hapoh ka Expert Committee, neiliang ka VPP ym sñiawphær ko lada wan da ki stat kiwa na baar neibhah ya kayi wa toh u leh u man ko neibynta i yooluti wa i angnood ki paidbah wow pynhunlang ya waroh 3 tylli ki jaitbru.
Hawa yatoh wym pu lai e ka VPP yeiwa kwah ko u pynkylla cha ka sorkar næ cha ka Reservation Roster Committee, neiliang u khliehdooh ka VPP uwa man leh u MLA na Nongkrem da ong u wa toh i kaam yong ka Expert Committee wow pait wei wow leh kammon u pynbait ya ka Reservation Policy.
