Ka Jaiñtia National Council-Western Zone ynnin ka sngi hapoh i yahkhmat u President, u Hamehi Bamon chirup i emlang u General Secretary deilang ki kattu katni ngut ki dkhot, da lai yachem ki wa u DMHO ka West Jaiñtia Hills District, u Dr. K. Dhar wow yaklam paan pynche ya kiwa boon ki bynta heiyatoh wa ki kaam yong i chait i khiah.
Ka seiñ da kylli ko heiyatoh wa ka MCH Hospital yow dawa pynboon ki thaw thiah neibynta kiwa kjut neibhah da chem wa duna palong ko.
Da kylli leh chaphang uwa leh Post-Mortem ha Civil Hospital wa em du uwi donhi katkam wa man kattæ wei da toh u booh ya uwa yarap ya uwa leh Post-Mortem.
Ka seiñ da pynsñiaw ko leh ya kiwa yah kari wa em ha ki PHC wa CHC wa em du samen donhi wei ha ini leh da toh wow booh ar ngut yow pynsuk ya ki Doctor kamjooh ya kiwa kjut.
Da dawa leh wow pynbiang yei rukom chakri ki Ambulance wa em ha PHC, CHC wa Civil Hospital neibhah wa chem wa leh stiñ kiwa krehkaam, heiwa manda sih ki ym em de phah chna ki neibhah ki Ambulance toh u man kiwa da pynkhreh u lai ha iwon iwon i por.
Da yaklam leh yei wym biang ki dawai dachin ha ki PHC wa CHC hadooh wa hap ki paidbah kiwa dooh wa duk wow hap lai thied wot ya u thyrnia leh.
Cha ki thaaiñ palatsor won ym em biang ki Generator hawa dooh bordiñ hadooh wa da yoo wyrai u pait yei chem chitom ki paidbah kiwa da hap wow pynemkaam da ki Torchlight, da ong ka seiñ.
Ka seiñ da kdaw ko leh yei eh wa maad ka PHC wa em ha Pdengshakap hapoh ka Amlarem Block kawa da jæd da pai kawa da joo um heipor wa slap wot hapoh ki kamra wa pait ya kiwa kjut wa chitom kamjooh ha waroh hi kawi ka PHC.
Da booh leh i kyrpaad ha u DMHO wow wanrah ya ka Centre thoh Exam neibynta ki Nurse yow pynsuk ya ki khon ka Ri-loom Jaiñtia.
Neiliang u DMHO da kular u wow chimkhia ya kini waroh wei lada emkaam daw pynsñiaw u leh cha ki bor kiwa haneiñ wow leh yeiwa emkaam.
Ka seiñ da ong ko wa daw lai booddien ko hawa yatoh wa kani ka kaam neipor cheipor neibynta i miat i bha i chait i khiah yong kiwa chong chnong ka Ri-loom Jaiñtia.
Discussion about this post