Ka Khasi Authors’ Society ha i yachem wa da pynman ha nongbah Delhi dang ini wa dep, da chim ya 4 tylli ki rai wei da e por leh ya ka sorkar India wow leh ko iyi iyi hachwa wow em biang ka dorbar Parliament, wei lada ka sorkar ym ye ko wow e yei jubab, neiliang ka KAS daw pyrkhat biang da kiwi ki laad yakhih.
Hawa klam wa kiwa thoh khubor ha Shillong, u President ka KAS, u Dr. DRL Nonglait da ong u wa ki rai wa ka KAS da chim ko toh wa ka yung krehkaam u Home Minister ka ri toh u e ko yei pynche hajrong ki dorkhat kiwa ka Society da dep ko wow e kti ha u Amit Shah ha i por wa wan u cha Shillong ha u Duiyatra (Jan) 2021, wei kawi ka dorkhat yow pynkynmoo biang ya u Amit Shah ha u Naiynñiaw 2021, neibhah hadooh kattæ ka sorkar ym pu em e jubab ko iyi iyi.
Ka rai kawa ar toh wa ka sorkar India hap ko wow chim noh ya ki luti wow pynkhreh ya ka aiñ wow tyrwa kam ka Bill ha ka sien chong dorbar ha Parliament kawa daw man.
Najrong ini, ka KAS da chim rai ko leh wow pynbiang ya ka thup wow pynsakhiat namo ka Documentation yow pynyoo wa ka ktien Khasi da toh por wow yoh yei tipmit noh ha ka 8th Schedule wa ka rai wa khaddooh wa ka KAS da chim toh yow paan jubab na ka sorkar hachwa ka dorbar Parliament wei lada ym ye wow pynmankaam, da maham wow pynman da kiwi laad yakhih yow pynyoh yei dawa.
U Dr. Nonglait da khana u wa heipor wa em ki ha Delhi, da lai ki wow e dorkhat thymme ha ka yung krehkaam u Amit Shah, ha yung krehkaam u Montri Rangbahdooh, u Narendra Modi wei kamjooh cha ka yung krehkaam ka President ka ri India, ka Draupadi Murmu.
Neiliang kiwa yahkhmat ka KAS da e khublei ki leh ya waroh kiwa embynta wow e kyrchaan ya ka yakhih yong ki ya ka seiñ ha Delhi, nadooh kiwa mihkhmat paidbah, kiwa yahkhmat seiñ saiñpyrthai, ki seiñbhalang wei kamjooh ki bru chemphang kiwa em cha kiwi won ki skurbah ka ri India kiwa da embynta lang waka KAS ha ka Seminar kawa da pynman ha katai ka nongbah.
Discussion about this post