Ynne ka sngi, ka KSU Narpuh Circle hapoh i yahkhmat u KS Suchiang kam u President deilang wa kattu katni kiwa yahkhmat ka seiñ napoh ka District Unit da lai ki wow booh da ka FIR hapoh ka yung krehkaam u SP ka East Jaiñtia Hills District yow pynchitom ya ki pulit kiwa emkti wow dat bru ha ka Public Hearing yong ka Meghalaya Cement Ltd wa em ha Thangskai kawa dang dep pynman ha ka 24 tarik uni u bnai.
Ha ka FIR da dawa pynchitom ya u Addl. SP, u Dy. SP wa waroh kitu kiwi ki pulit kiwa da pynemkaam bakla yei bor wow sympat lathi ya ki kynthai, ki chynrang wot ya ki khynnah deiwa ong hanla emhok ki pulit wow pynyoo dei bor tangwa iwa jia ha ka Public Hearing toh i pynemkaam bakla yei bor cha wa palat wei ym ye wow pdiang.
Chooh chooh da ong wa kini ki pulit da chah hukum ki leh ha ki heh ka Topcem kiwa da phah wow bom u dat ya ki bru.
Da ong leh wa ki pulit ym em hok ki wow dat ya ki kynthai wa ki khynnah iwa da yoo ha ki Video wa da poor heiwa uwi u heh pulit da dat u ya uwi u khynnah wei ha iwi won da chah maham uwi u khynnah ya chah pynsepai ka mynried yong oo wei iwi won da yoo kdar yei chah sympat kawi ka kynthai kawa lai luti donhi.
Kamtæ da ong wa ini i leh bru khloo ki pulit khlem da pyrkhat khlem da maap ym yahaap de wow man ki kam ki bru wa ksoh ya ka aiñ wei ka aiñ toh u kreh ko salonsar pyrchah ya kini ki pulit neibhah da biang ki sabut wow pynyoo yei leh bakla ki pulit.
Ka seiñ da beiñ joor ko leh ya ki MLA ka thaaiñ kiwa suki hi-eh wei ym klam iyi iyi yeiwa jia ya ki paidbah wow dawa yei hok yong ki paidbah kamwa klam kop ki heipor wa yalap Election wow em ryngkat wa u paidbah lada chah thombor pyrchah i hok yong ki.
Discussion about this post