U Conrad Sangma uwa da chah jied yow man noh kam u Montri Rangbah ka Meghalaya ha ka sien wa ar kattu, ynne da lai e kti u ya ki chithi wa pynyoo ka UDP waka PDF yei kyrchaan ya ka NPP yow chna sorkar.
Kam wow pynkynmoo wa ynnin ka yaleh wow chna sorkar da kylla syndet ko deiwa wan ka UDP waka PDF yow e noh yei kyrchaan ya ka NPP yow chna sorkar hadien wa ka HSPDP da dep phah chithi ko cha u Conrad uwa man leh kam u National President ka NPP wym em yoh bor ki MLA yong ka wow kyrchaan ya ka NPP.
Neiliang u Conrad chwa u wan ka UDP wa PDF leh da dep lai e u yei pyrtuid ki MLA kiwa da soi pyrtuid yow pynyoo yei kyrchaan wa kynthup ya ar ngut ki BJP, ar ngut ki kyrtong khlem seiñ, ar ngut ki HSPDP deilang wa 26 ngut ki NPP iwa mut 32 ngut waroh.
Deiwa wan won sa ki MLA ka UDP kiwa em 11 ngut wa ar ngut na ka PDF kattu da em 45 ngut hapoh ka sorkar thymme kawa da e pyrtuid MDA-II.
Hawa yaklam wa u Lat ka jylla, u Phagu Chauhan, u Conrad da batai u ya ini waroh.
Kam wow pynkynmoo wa i pynsmai ya ka sorkar thymme u pynman mynstep ka sngi.
