Ynne ka sngi ka khynroo khyllood Committee yong ka Kur Sookpoh Khadar Wyrnai Jowai waka Jingiaseng Samla Balang Presbyterian Jowai da lai e snaam sñiawbha ki ha Jowai Blood Bank wa em ha Panaliar, Jowai kam chibynta u yarap yaki para bru wa emkaam yarap næ kiwa em ha kyndian i im hei kjut chitom.
Haka yalang tbian chwa wow chimbynta ki hei e snaam, da yoh i klam na kiwa yahkhmat ka Jingiaseng Samla Balang Presbyterian Jowai, na ka Kur Sookpoh Khadar Wyrnai Jowai, naka Medical Superintendent Jowai Civil Hospital, ka Dr. A. Paswet wa kiwi.
Ka Dr. P. Shylla In-charge Jowai Blood Bank hawa klam yahkhmat da batai ko ya ki kyndon wa ye u e snaam ya ki kynthai wa chynrang, wei ong ko leh wym emkaam u tieñ næ pyrkhat boonjait wow mih chakhmat u e snaam neibhah neiliang ki bor pynlai ka Blood Bank leh daw sylli ki yei chait i khiah chwa wow chim snaam.
Khana haroh ko wa kani ka sngi man ko kawa kyrpang haka ri India neibhah ha kani ka sngi da kha ya u pa ka ri India, u Mahatma Gandhi, kamjooh leh ha kani ka sngi da kynmoo burom man-u-snem yaka National Voluntary Blood Donation Day næ ka sngi wow sñiawngooh ya kitu wa jooh e snaam sñiawbha cha ki Blood Bank kiwa man ki chrot wa kyrchaan ya kawi pa kawi ka Blood Bank yow yoh u e snaam cha ki bru wa emkaam snaam.
U Puramon Kynjing hawa klam ong u, boon kiwa ngait wa ka poisa toh kawa kordor, tangwa la boon poisa mynkna leh ym yoh u thied yei snaam heipor wa emkaam kamtæ man ko ka wym myntoi hi.
“I snaam wa e cha kiwi man ko u mot wa sahnaam neibhah kitu wa yoh yarap kut wa ngooh Blai wym dam ki u ngooh u kynmoo yei snaam wa pynim ya ki hanla ym tipmit ki ya ki bru wa e leh,” da ong u Puramon Kynjing.
Ha kani ka sngi kam ka dak i sñiawngooh ya kitu wa jooh e snaam sñiawbha, ka Blood Bank Jowai da e ko leh da ki Memento cha ki.
Discussion about this post