Hadien chi sngi wa wan pait ki ar Montri Rangbah ya u pood, neiliang u MLA ka Rambrai Jyrngam, u Kimfa S Marbaniang da ong u wa ini i lai pait ya ka Langpih ye ko wow man ha ki ar bynta, iwi ye u man wow pynbait noh ya u pood u ang katwa iwi won toh i leh buit yong Politics tang wow yoh phang (Issue) ha ka Election.
Da ong u wa i lai ha ka yalang wa da pynkhreh du da ka Assam wei da liwan biang khlem lai cha ki thaw wa emkaam man ko kawa wym yahaap, wei ini pynyoo i wa i kam ka Assam da man i chawa palat wei wow pynbait ya u pood dang yoo chitom wei ymyoo dur wow poi cheiwon cheiwon leh.
U MLA ka Congress da ong u leh wa lada chimkhia sakhiat ki ya u pood da toh u phah wut-wut ya ki Regional Committee wow pyndep ya ki kaam wei wow thooh yutip na ki paidbah heiwon i liang kwah ki wow em.
Da ong u leh wa lada em sakhiat i thmu wow pynbait ya u pood ymtoh u lai ki du ha Langpih, tangwa cha ki thaw wa jooh mih kajia dei langær kam ha Mawsikar, Umwali, Mawdiangsnam wa Bangjeng neibhah wa man ki ki thaw kiwa ka Assam pyndik ko dei langær.
Ha iwi won i liang da ong u leh wa hawa thmu wow pynbait ya u pood emkaam leh wow tip ya ka parom wa ka Hima Nongmynsaw kawa da em hadooh ha Boko nadooh ki por nachwa wow yoh ya ka jylla.
Da ong u wa nachwa kiwa chong chnong jooh lai ku ki chadooh u Loom Kamakhya wow pyndep ya ki kaam yong ki, da ong u wa i kyntien “Kamakhya” ymtoh i ktien Assamese, tangwa da chim na ki ktien Pnar iwa ong “Kaam wa khia” heiwa hei ktien Khasi won man i “Kam ba khia”. Da ong u leh wa nachwa ya ki kaam wa khia da jooh lai pyndep ha utai u loom, tangwa ki paidbah ka thaaiñ katni ym kwah ki wow paan yei thaw nadooh neitai, kwah ki wow e nadooh Wah Synthi cha Wah Rambrai wa Wah Tyrso.
