Kiwa lai puræ ka North Eastern Hill University (NEHU) hapoh ka lama ka NEHU Students’ Union (NEHUSU) ynne ka sngi da dawa hiar chuki ki ya u Vice Chancellor (VC), u Prof. Prabha Shankar Shukla hajrong i wym ye u wow yaklam yow pynkrehkaam ya ki phang dawa yong ka NEHUSU neibynta ki khynroo khyllood wa lai puræ.
Kini kiwa lai puræ da sdang ki ya kani ka yakhih nadooh i por 11:00 waje i step deiwa khlem lai cha ki kamra chong Class, tangwa da lai kær kut ki ya ka thaw wa sah u VC hadien wa pynman chwa ya ka lai paidbah na Central Library hadooh ka yung krehkaam (Administrative Block), wei neidaw wa u VC ym em u ha kamra krehkaam, da lai ki cha U Kiang Nangbah Guest House & Auditorium heiwa da kbai ki ya ki ktien wow beiñ ya u VC.
Kani ka yakhih yong kiwa lai puræ ka NEHU pyrchah ya u VC toh wa hadien wa uni u heh dooh ka NEHU ym bien u wow yaklam yow pynkrehkaam ya ki phang dawa ki khynroo khyllood wa lai puræ wa kynthup iwa yatoh wa ki Hostel yow pynbiang yei baam wa bha, wow pynyoh WiFi wei wow wanrah ka Library wa kyrpang neibynta ka School of Technology (SOT).
Kiwi de ki dawa toh wow pynbiang ya ki tiar ki tar hapoh ki Laboratory wei wow pyndam kreh ya u Rohit Prasad uwa da chah pynbaad wa da thung kreh pyrchah ya ka aiñ yow man kam u Technical Officer Senior Consultant da u VC.
Neiliang u VC da kular u wa ki bor pynlai ka University daw chimkhia ki yeini wei daw pynbiang ya waroh ha u bnai nyngkong u snem thymme.
Discussion about this post