Ka National People’s Party (NPP) ynne ka sngi da lai wow kam hakhmat u Lat ka jylla yei boon paaid neibynta wow chna ya ka sorkar wa thymme ha ka jylla.
Neiliang ka BJP da dep ko wow pynsñiaw yei kyrchaan ya ka NPP yow chna ya ka sorkar, wei katkam i kam u Conrad, ka NPP da biang ko ya ki MLA wow chna ya ka sorkar.
Kamwa man kattæ, ka NPP kawa da jop 26 ngut ki MLA, da yoh ko yei kyrchaan na ka BJP 2 ngut wa uwi u MLA wa khlem seiñ na Baghmara, u Kartush R Marak. U Conrad da kam u leh wa da em kiwi ki MLA na kiwi ki Party wow e kyrchaan ya ka NPP wow chna sorkar.
Heijooh i por ha ka yalang kawa da man ha yung sah u Conrad, ka NPP da chim ko ya ka rai wow e kti ha u Conrad K Sangma wow yahkhmat kam u Parliamentary Leader.
Ki khubor wym pu ye u pyntikna, da ong wa ka PDF waka HSPDP kiwa em mar arngut ki MLA toh kiwa da chah khut wow emlang ha kani ka sorkar.
