Kam chibynta ka thong wow yada ya ka rym-aw wei wow pynkrehkaam leh ya kiwa boon ki aiñ yada rym-aw kiwa kynthup ya ka aiñ Environment Protection Act waka aiñ Biodiversity Act, neiliang ka yung krehkaam yong u Range Forest Officer, Mairang Range deiwa synraan lang ki bor pulit ka Eastern West Khasi Hills District, ha ka 16 tarik uni u bnai da lai sylli ki ya ki kaam thang rngaw kiwa man pyrchah ya ka aiñ ha ki kattu katni ki bynta yong ka District.
Ha ini i lai pait lai sylli da chem yei thang rngaw pyrchah ya ka aiñ, ka khayi wa i kit rngaw pyrchah ya ka aiñ ha kiwa boon ki thaw khamtam ha ki thaaiñ Sohjarang wa Pathar Lyndan neibynta wow pynpoi cha ki kharkana kiwa em ha Ri-Bhoi District.
Ha katai ka sngi da yoh leh wow tympra ya ki kattu katni ki thaw thang rngaw wa ki thaw wa pynlang rngaw pyrchah ya ka aiñ wei da rah leh ya u rngaw wa da thang pyrchah ya ka aiñ.
Wot hapyrdi wa boon ki duna kam i duna bru, ki tiar ki tar hadooh ki kari, ka yung krehkaam u Range Forest Officer, Mairang Range ha ki snem wa da lai da pteiñ ki wow pynman yei lai kem wei lai kynreh ya kam kini ki jait kaam wa pyrchah ya ka aiñ.
Kamtæ da kyntu ya kiwa pynlai chnong ka thaaiñ wow ya krehlang ki waka chnat Forest yow khanglaad ya kam kini ki kaam wa pynsih ya ka rym-aw, da ong u Range Forest Officer ka Mairang Range deiwa ong leh wa ka yung krehkaam yong oo daw pynman ko ya ki pynsñiawthooh paidbah hajrong kiwa boon ki aiñ yada rym-aw neibynta ki paidbah yong ka ka thaaiñ.
