Jowai: Kam chibynta wow paitbniah ya i wan khayi wa i seiñ khih wa man pyrchah yaka aiñ da ki baar jylla ha ki thaaiñ yong ka West Jaiñtia Hills District, ha kani ka 16 tarik, ki ar tylli ki seiñ, kiwa kynthup ya ka Hynniewtrep Youth Council (HYC) wa ka Jaiñtia Student Movement (JSM), deiwa emlang kiwa yahkhmat chnong ka Ummulong deilang wa ki pulit da lai khynra ki ya ki dukan kamjooh leh ki karkhana yong ki baar jylla kiwa em haka chnong Ummulong, West Jaintia Hills District, wa lada ki em ki næ ym em ki kot ki sla kiwa biang khamtam ka NRC.
Ha kani ka lai khynra ya ki dukan yong ki baar jylla da chem ya kiwa boon hi ki baar jylla khamtam kiwa na jylla Assam ki wym em ki kot ki sla wow pynyoo yeiwa em ki hapoh ka NRC, kamtæ neiliang yong ki ar seiñ kamjooh leh ka chnong da e por ko ya kini ki baar jylla chi tayaw wow pynsakhiat wa ki toh kiwa em pyrtuid hapoh ka NRC, wei lada ym ye ki wow pynbiang ya ini toh u khnang khyrdep noh chi syndon yaki dukan næ ki karkhana yong ki.
Ha katai ka khynra da em hadooh kamwa 15 tylli ki dukan kiwa kynthup leh ya ki karkhana yong ki baar jylla kiwa haap wow pynbiang ya ka NRC yong ki.
Ha kani ka lai khynra neiliang kiwa yahkhmat ka seiñ kiwa kynthup ya u R. Lamare, General Secretary HYC, u P.S. Phawa Joint Secretary JSM, da ong ki wa kam kani ka lai khynra ya ki baar jylla da ki ar seiñ u pteiñ ko ha waroh kawi ka ri-loom Jaiñtia. Kiwa yahkhmat ka seiñ da kyntu ki ya ki bor chnong wow ya krehlang neibynta wow khang laad ya ki baar jylla wow khayi pateiñ khlem ki kot ki sla wa biang hapoh ka chnong ka thaw.
Ha kani ka lai khynra, neiliang ki pulit da yahkhmat da ka I. Nongrum na Women PS (Infiltration) Jowai, kiwa kit kaam ka chnong Ummulong deilang wa ki dkhot yong ki ar seiñ na ki Circle wa Unit waphær waphær.
Discussion about this post