Ka MLA ka East Shillong, ka Dr. M Ampareen Lyngdoh ynne ka sngi da lai ko dei kjat yow pyndep kaam waroh chi sngi kam ka dak wow kyrchaan ya i yakhih ka Meghalaya Joint Action Committee of Commercial Vehicles (MJACCV) wow dawa na ka sorkar wow pynhiar ya ka dan i phñiang kari.
Hawa yaklam wa kiwa pathai khubor, ka Dr. Ampareen da ong ko wa da yaklam ko wa u Symbood Montri Rangbah, u Prestone Tynsong uwa da pyntip wa ka sorkar daw chim ko ya i rai ha ki sngi wow wan neibynta ini deiwa ong leh wa ki paidbah toh u tip ki ya i daw wa pynku ya i dan ka Petrol wa Diesel.
Hajrong i wym mano ka sorkar ya i dawa kiwa kamai kari, ka MLA ka Congress da ong ko wa kawon kawon ka sorkar ka wym phrat luti wow wanrah ya i bhalang, u poi i chawa eh, deiwa pynrap wa ym kwah ko wa ka Shillong u kyruiñ biang ko cha ki por nachwa wa boon du i khang chnong khang sarok wa kiwi ki jait yakhih.
Heijooh i por ka Dr. Ampareen da kyntu ko ya kiwa yahkhmat i yakhih wow pyrkhat bha dei wym ktah ya i suk i saiñ, deiwa ymtoh u chim kabu ya i kyrchaan wa yoh ki na ki paidbah, neibhah hap pyrkhat leh neibynta kiwa dooh wa duk.
