I thmu yong ki seiñ ri-loom wa kynthup ya ka UDP, HSPDP, PDF, VPP deilang wa ka AITC wa INC wow chna sorkar da sepai noh i hadien wa 2 ngut ki MLA ka HSPDP da mih ki wei da wiar syndon ki na ka yalang kawa da man ynne i janmiet.
Kini ki MLA kynthup ki ya u Shakliar Warjri na Mawthadraishan wa u Methodius Dkhar na Mawshynrut.
Katkam wa khana u President ka HSPDP, u PK Pangniang da ong u wa kini ki 2 ngut ki MLA da poi ki ha katai ka yalang tangwa da wiar noh ki hadien wa ong yow lai baam ja.
Hadien ini da chem wa kini waroh arngut da lai ki wow e ya ka chithi kyrchaan ya ka NPP yow chna ya ka sorkar, wei neiliang u MLA wym em seiñ na Rambrai Jyrngam, u Remington G Momin leh da lai chwa u cha ka yalang ki seiñ ri-loom tangwa da lai won u wow kyrchaan ya ka NPP yow chna sorkar.
Katkam ka khubor wa da yoh, ki 2 ngut ki MLA ka HSPDP da e daw ki wym kyrchaan ya katai ka krehlang ki seiñ ri-loom neidaw wa emlang ki seiñ kiwa na baar wa kynthup ya ka TMC wa Congress. Heiwa da ong ki wa dang lah wow lai kyrchaan ya ka NPP kawa na kani ka jylla kawa ya krehlang wa ka BJP.
Ini mut i wa kattu ka NPP kawa em 26 ngut ki MLA da yoh ko yei kyrchaan ka BJP kawa em 2 ngut ki MLA, ka HSPDP leh 2 ngut wa 2 ngut ki MLA samen iwa mut da yoh 32 ngut yow chna sorkar noh.
