Ki MDC ka Voice of the People Party (VPP), wa kynthup na Khasi Hills Autonomous District Council (KHADC) wa Jaiñtia Hills Autonomous District Council (JHADC), ynne ka sngi da lai ood ki hakhmat u Symbood Montri Rangbah uwa pait ya ka chnat District Council Affairs (DCA), u Prestone Tynsong neidaw wym yoh Scheme ki MDC ha ki Constituency wa em ha sor lyngba ka 15th Finance Commission.
Ha ini i lai cha ka sorkar yow yarap pynyoh ya ki Scheme, neiliang ka KHADC da lai hi ko da ka Executive Committee hapoh i yahkhmat u Chief Executive Member (CEM), u Shemborlang Rynjah, katwa na JHADC da wan mihkhmat da uwa yahkhmat ka Liang Pyrchah, u Andrew Shullai uwa man u MDC ka Jowai North.
Hawa klam hadien i yachem wa u Symbood Montri Rangbah, u Executive Member ka KHADC wa pait ya ka chnat Kaam Pynroi, u Powel Sohkhlet da khana u wa em ki chnong kiwa haap ha ki thaw ka Municipal yong ki Constituency wa em ha sor Shillong wa Jowai wei kini ym em yoh Scheme ki hapoh ka 15th Finance Commission lyngba ka Ministry of Panchayati Raj.
“Em ki Constituency ha Shillong wa Jowai kiwa haap hapoh ki thaw ka Municipal wym yoh ki ya ka Scheme neibhah wa toh ka Scheme ki thaw wa em cha palatsor. I da yoh i ya ka poisa na ka 15th Finance Commission wei i da saam i cha ki MDC, katwa ki MDC wa em cha sor won da ong ki kammon yoh Scheme du ki MDC wa em cha palatsor,” da ong u.
Da pyntip u leh wa neiliang u Prestone da chimkhia u wei da kular u wow khut yalang u ya ka chnat Pynroi Sor ka jylla wa ka C&RD yow pynlait na ini i eh.
Da ong u wa ki MDC wa nachwa ki yoh ki ya ka Scheme neidaw wym em pynekaam ki da kor Internet næ deiwa phah cha ka Website ka Ministry.
Hawa kylli, u Powel da ong u wa hawa sdang ym emkaam wow leh lyngba ka Website wei ki MDC sor leh yoh ki ya ka Scheme tangwa nadooh wa leh da ka Online da kyntait heitu hi.
Discussion about this post