U kyrtong MP ka UDP uwa da monglang ka HSPDP hapoh ka chatri ka Regional Democratic Alliance, u Robertjune Kharjahrin ynne ka sngi da pynman u yaka yalang yalap Election ha Khliehriat West, East Jaiñtia Hills District heiwa da pynlai ya ka da u Finelyness Bareh deiwa wan chimbynta da ki Waheh Chnong, ki Secretary Chnong wa kiwi kiwi.
U Treilang Suchiang, MDC ka Shangpung hawa e i klam da ong u wa boon ki MDC ka UDP toh kiwa jop na kani ka thaaiñ East Jaiñtia wei ngait skem u wa ha kani ka Election MP leh u tam ko na kani ka Party.
Da ong u wa manda poi ka UDP ha ka thong daw em ko haka sorkar wei da ong u wa u MP wa katni, u Vincent Pala ymye u wow wanrah yarap ya ki paidbah neibhah wa chong u ha ka liang pyrchah deiwa kyrpaad ya ki paidbah wow chon ha ka Bom ha kani ka 19 tarik wow wan.
U WG Sungoh, MDC ka Mowkaiaw hawa e i klam da ong u wa ka sorkar pyrdi hapoh i yahkhmat ka BJP da wanrah ko yaka aiñ CAA wei kani ka aiñ da booh ko hei maa ya ki paidbah ka jylla neibhah hanlada ym krehkaam ko ha Meghalaya tangwa krehkaam won ko ha Assam wei ini e bor i ya ki baar jylla wow wan seiñ kreh ha ka jylla kamtæ emkaam u jied yaka UDP wow yoh MP khnang wow ye u yasaaid ya kam ini.
U Lasky Rymbai da ong u wa ka UDP em ko jar ki yurim wei u kyrtong wa thung ka UDP wa HSPDP toh u Robertjune wei man u uwa da ih bha wow mihkhmat yaka RDA kam u kyrtong MP. Da ong u wa ka Election MP man ko kawa emkaam bha neibynta ka jaitbru Ynñiawtrep Ynñiawskum.
Da ong u leh wa i lehbor ka BJP da tynyap ko yaka Article 370 wow pyndooh yei man kyrpang ka Jammu & Kashmir katwa kamtæ emkaam wow yasaaid heiyatoh waka jylla yei man kyrpang ko khamtam yei em ki District Council deiwa kyrpaad ya ki paidbah wow kyrchaan ya u Robertjune kam u MP.
U Titosstarwel Chyne, MDC ka KHADC da ong u wa ki paidbah kheiñstiñ ki ka ka Election MP tangwa emkaam wow sñiawthooh wa man ko kawa emkaam tam yow yoh ya ki Scheme wa lai cha ki chnong wa ki Club wei ym em ki Scheme ya ki bru samen kam ki Scheme MLA.
Da ong u leh wa emkaam u sñiawthooh wa ka Parliament toh ka thaw wow chna ya ka aiñ wow yada yaka jaitbru deiwa e nongmuna yaka CAA wa wanrah da ka sorkar pyrdi kawa ktah ya ki paidbah wa khian paaid kamtæ emkaam ya uwa mihkhmat wow yasaaid yaka jaitbru.
Heiyatoh wa i khang ya u mooyong ha u 2014, da mih i yakhih wa joor tangwa u MP wa katni ym em klam u heiyatoh wa ini i khang ya u mooyong.
U Kyrmen Shylla hawa klam ha kani ka sngi da ong u wa boon ki paidbah phylla ki wa oo ymem kreh u ya kani ka Election MP tangwa emkaam u em ki wa oo kamjooh waka Party khnang wow yoh ka Party ya u MP.
Da ong u wa ha ka Election 2023 da em kiwi ki Party kiwa kular wow e surok ya ki chnong tangwa hadooh katni tang chi top i psiang leh ympu yoo wa em ha kini ki chnong tangwa oo hi da kreh u khlem heh du i kular donhi.
Chooh chooh da ong u wa kamwa da jied ki paidbah ya oo ha ki snem wa dadep kamtæ kyrpaad u leh ya ki wow kyrchaan biang ya u kyrtong ka Party kam u MP.
U Metbah Lyngdoh da ong u wa ka Khliehriat Constituency da chaniah ko yaka UDP lyngba u Kyrmen Shylla wei neiliang ka Party leh yooluti ko wa ki paidbah u pteiñ ki u kyrchaan ya u kyrtong yong ka ha kani ka Election MP.
Da ong u leh wa wan u ynne ka sngi ymtoh kam uwa na ka UDP tangwa na ka Regional Democratic Party (RDA) wei wow pyntikna wa ki paidbah u e MP ki da uwa naka UDP waka HSPDP.
Chooh chooh da ong u wa haka Election MLA 2023 na ki 36 tylli ki Constituency hapoh ka Shillong Parliamentary Constituency da yoh ka UDP hadooh kamwa 3 lak Vote wei ka HSPDP won da yoh ko 66,000 Vote kamtæ ngait skem u wow jop ha kani ka Election MP.
Heijooh i por da ong u wa da jied ya u Robertjune kam u kyrtong toh wa man u uwa stat heiwa man u kam u muktiar wa yasaaid aiñ u wow yasaaid leh yei hok wa i dustur ka jaitbru ha Parliament.
Ha kani ka sngi da yoh leh i klam na u Kor Sympli, u J. Pyrtuh, u Helping Phawa, u P. Dkhar, u Jemino Mawthoh wa kiwi kiwi kiwa da kyrpaad ya ki paidbah wow kyrchaan ya u Robertjune ha kani ka Election MP.
Discussion about this post