Ynne ka sngi u montri ka chnat i chait i khiah ka jylla, u AL Hek chirup wa u montri ka chnat ki kaam pohyung ka jylla, u Lahkmen Rymbui da lai pait lai sylli ki ya ki thaw sumaar wa kynthup ya ka Jarain PHC, Padu State Dispensary wa ka Pdengshakap PHC.
Ha ini i lai sylli da emlang leh u DHS (MI) u Dr. Aman War, u DMHO ka West Jaiñtia Hills, ka SDO ka Amlarem Sub-Division, ka J. Kharpuri wa kiwi kiwi ki heh na ka chnat i chait i khiah.
U Hek wa u Rymbui ha kani ka sngi da yaklam ki wa ki Doctor kini ki thaw sumaar wow kylli yeiwa duna ha kini ki thaw sumaar khnang wow ye u leh yeiwa emkaam heiwa ki Doctor da pyntip ki yei emkaam ya ki Doctor wa ki wakreh kamjooh leh wow chna pynthymme wei wow pynmiat ya ki yung namo ki Building kini ki thaw sumaar.
Da yachem ki leh ya ki Waheh Chnong ki chnong wa em ha ka thaaiñ wow ap yei eh i khoo wa yachem ki paidbah.
Neiliang ki waheh chnong da kyntu ki ya ki montri wow pynboon ya ki wakreh nadooh ki Doctor, ki Nurse wa kiwi kiwi wei khamtam dooh wow pynku kyrdan ya ki thaw sumaar.
Neiliang u Rymbui hawa e i klam ha kini ki thaw sumaar da ong u wa ini i wan pait ya kini ki thaw sumaar toh wow tip yei man i long ki thaw sumaar wei iyi i duna ha ki khnang wow ye u leh yeiwa emkaam.
Da pynrap u leh wa hanlada kular wow e yeiwa emkaam, ymye won i wow jia pyn myntu mynstep hiwot tangwa emkaam wow man kiwa yaichah.
Neiliang u Hek da kular u wow chimkhia u leh yeiwa emkaam kini ki thaw sumaar deiwa pynbiang ya ki Doctor, ki wakreh ha ki kyrdan waphær waphær.
Heiyatoh won wow pynku kyrdan ya ki PHC cha ki CHC da ong u wa da em ki kyndon wa da booh ka sorkar wow ye u pynku kyrdan wei kawi na ki toh wow em ki bru kamwa 80,000 ngut wa chaniah haka thaw sumaar.
Chooh chooh da e yaroh u ya i chakri kini ki thaw sumaar ya ki paidbah wow yakhun ya ka khlam COVID-19 wei neini ka Jaraiñ PHC leh daw ye noh ko u sdang ya ka In Patient Service.
Heijooh i por da yaroh u ya ka Pdengshakap PHC wa man ko ka thaw kawa khooid deiwa pynrap leh wa ka sorkar daw thung Doctor ko sa uwi ha kani ka thaw wei daw pynlait ko leh T. 50 lak wow ye u thied Generator wei wow chna pynmiat ya kani ka thaw sumaar.