Lai pait u Conrad ya kiwa mynsoo na i yakhih pyrchah yaka CAA

Jowai: U montri rangbah ka jylla u Conrad Sangma, ynne ka sngi da lai pait u ya kiwa thiah Hospital kiwa mynsoo haka yakhih pyrchah yaka Citizenship Amendment Act, 2019 ha Shillong yow kitbok kitrwiang yaki yow yoh ki yei chait i khiah wa smat.

Kam wow pynkynmoo wa haka 13 tarik uni u bnai da mynsoo palat 40 ngut ki bru paidbah wei da em leh ki pulit kiwa da mynsoo heipor wa lai ki paidbah cha yung u Lat ka jylla ha Shillong yow dawa pynkrehkaam ILP kamjooh yaka MRSSA.

I mynsoo da mih i na i chah bom lathi ha ki pulit wa na i siat tadong lær pynjhia khmat ki pulit kiwa pyrchang u khang ya ki paidbah wow toor cha yung u Lat.

Ynnin ka miet, u Conrad da lai u leh cha Police Bazar Shillong, yow pait yaka yaw Christmas wei da sñiawkmen u wow yoo wa ka yaw man ko kawa lai bait wei da yaklam u leh wa kiwa chong dai mar.