U Montri Rangbah ka jylla, u Conrad Sangma ynne i step da lai hiar u cha Lumshnong yow lai pait yei chah ktah u sarok NH06 ha i bynta hajan ka Lumshnong Toll Plaza heiwa u sarok da chah rah chah rong u neidaw wa joor slap heiwa da em leh artlli ki kari wa da ngam wa kynthup ya ka Truck wa kawi ka kari khian.
Heini i jia iwa ha ka 16 tarik uni u bnai, da chah rah u Handyman ka truck heiwa yei metyap u da chem ynnin ka sngi.
U Conrad da khana u wa i kreh wow pynchna ya uni u sarok da pteiñ i khlem sangeh wei lada duna u slap daw ye u chah u lai biang ki truck khamtam kiwa kit ya ki marbaam wa kiwi de ki mar wa emkaam hapoh 72 kynta.
Da khana u leh wa ki kari khian da e laad wow lai ki na kiwi luti wa ki thaw yong ki bru samen wei ya kiwa dang sahkut da e yarap ya ki da ki baam wa kiwi de kiwa emkaam ki wei da e khublei u leh ya waroh kiwa da yarap nadooh ki NGO, ki bru paidbah wa kiwi kiwi de kiwa da chimkhai wow e yarap cha kiwa sahkut.
U Conrad da yaklam u leh wa kiwa yah kari khamtam kiwa yah truck kiwa dang sahkut wei da lai pait u leh ya u sarok wa lai lyngba ka Star Cement wa pynlait ya kari khian u lai ki.
Deilang wa u Conrad da emlang leh u Montri ki kaam pohyung u Lahkmen Rymbui wa ki bor District ka East Jaiñtia Hills.
