U Montri ka chnat Forest & Environment ka jylla, u James Sangma ynne ka sngi da lai pait u yei kaam wa yatoh wow pynkhooid wei wow pynkhai im ya ka wah Lukha deiwa emlang ki sahep ka chnat wa kiwa chong chnong.
U James da lai pait u ya ki nan khian wa da chna harood ka wah Lukha yow psan ya ki kynja aitlen namo ki Algae Pond ki ki wow baam ya iwa sih wa pynjakhlia ya ka wah.
U James da kular u wow leh katwa ye yow pynim biang ya ka wah Lukha khlem da pynthut ya ki khloo ki kjam wa em ha ka. Da ong u leh wa ka chnat yong oo paitbniah bha ko ya ki jakhlai wa mih na ki karkhana wa em ha kani ka thaaiñ.
Neiliang kiwa chong chnong wa em hajan ka wah da e ki da ka dorkhat ha u Montri wei da khana ki leh ya kani ka kaam wa da pynkreh kawa da wan poisa napoh ka District Mineral Foundation Fund heiwa ha ka dorkhat da paan poisa chooh chooh wow yoh yarap na ka Meghalaya Environment Restoration and Protection Fund (MERPF) yow yei u pynim pura ya ka wah Lukha yow yoh myntoi kiwa chong chnong ka thaaiñ.
Kam wow pynkynmoo wa i kreh wow pynkhooid ya ka wah Lukha iwa da lut T. 2.5 Klur toh iwa pynkreh daka Trinity Impex International, Delhi.
