U Montri wa pait ya ka chnat i chait i khiah, u James PK Sangma da lai pait u yei kreh wow chna ya ka Tura Medical College ynne ka sngi Thohdieñ. Wei i thmu wow lai pait ya ini toh yow chem lada em iwon iwon i thut wow pyndep ya ini i kreh.
Ya James PK Sangma da synraan da u Dr. Aman Warr, Director of Health Services, u Rakesh Sangma, Chairman ka Garo Hills Autonomous District Council (GHADC) wa kiwi de ki sahep ka chnat i chait i khiah.
Neiliang u Montri da pynsñiaw u yei hun i lai i kreh chakhmat deiwa ong leh wa ka sorkar da kreh chitom ko wow pyntikna wa kani ka Medical College u sdang krehkaam smat ko.
“I sumaar sukhær da man ko kawa da mih boon tylli ki chnat heiwa da em leh ki chnat wa emkaam bha wow pynjanai. Wei da slem ki khynroo khyllood yong i kiwa nep jabieñ kiwa em i thong wow kreh ha ki kaam sumaar da hap ki wow lai thooh thaw puræ cha baar jylla. Deiwa em ya ka Medical College hapoh ka jylla daw ye wow pynman kam ka jylla wa em ka yong i hi ka Medical College,” da ong u James Sangma.
U Montri da pynman u leh ya ka yalang wa ki sahep ka chnat i chait i khiah ha Tura Circuit House hajrong kiwa boon ki Scheme wa da pynkrehkaam.
U James da ong u, “Kwah O wow pyntikna wa ka chnat i chait i khiah deilang wa ka sorkar jylla da kreh chitom ki wow wanrah ya ki Scheme wa yatoh wa i chait i khiah neibynta kiwa chong chnong ka jylla. Kini ki Scheme daw yarap ki heipor wa emkaam jhan yei sumaar yow lait ki nei thut hawa lai phah sumaar ya idæ lane ya kiwa hayung hasem.”
