Shillong: U montri rangbah ka Meghalaya u Conrad K. Sangma deilang wa u montri ka kaam pohyung u Lahkmen Rymbui, u montri ka chait ka khiah u A.L. Hek wa u montri ka GAD u Comingone Ymbon da lai pait ki ya kiwa mynsoo na i awri awra wa mih hapoh ka sor Shillong ha kini ki sngi wa da dep.
Hawa klam wa ki laad pathai khubor hadien wa pait ya kiwa mynsoo ha Shillong Civil Hospital, u montri rangbah da pyntip u wa da e yei sumaar wa biang ya kiwa mynsoo wei man ki kiwa da lait nei maa. Da pyntip u leh wa em na kiwa mynsoo daw hap ki wow chah pooid mynstep ka sngi.
Da pyntip u leh wa ka sorkar u kitkhlieh ko yei bai sumaar kini kiwa chah pynmynsoo.
“I daw wa wan i yow pait ya kiwa mynsoo toh yow pynyoo yei sñiawkhia yong i wei wow pyntip leh cha ki wa i bai lutsan heiyatoh wa i sumaar sukher yong ki toh ka wow pynlut da ka sorkar waroh i jait”, da ong u Conrad.
U Conrad da ong u leh wa da leh ya waroh iwa emkaam yow wanrah biang yei chongsuk chongsaiñ, i pynkrehkaam yaka aiñ, wei da kyntu u ya waroh wow yait ki na kiwon kiwon ki kaam wa pynthut yaka suk ka saiñ yow yoh biang u wan ka chongsuk chongsaiñ.
Discussion about this post