U kyrtong ka seiñ Congress hapoh ka 4-Mowkaiaw Constituency, u Nehemayah Tyngkan da nang yoh mynsien chooh chooh u dei wan psiah palat 300 ngut kiwa kyrchaan warim ka seiñ UDP na kylleiñ ki chnong kiwa em haka thaaiñ Shilliang Myntang wa ka thaaiñ Barato ha ka 4 tarik uni u bnai.
Ha kani ka sngi da pdiang burom ya kini kiwa kyrchaan warim ka UDP da u Nehemayah Tyngkan ha ka yalang wa da pynman ha Community Hall ka Iooksi Iapkhla, heiwa da pynkup burom leh ya ki kam i dak wa da psiah ki cha ka Congress.
Ha kani ka yalang da yoh i klam na u Justice Paul Lyngdoh, u Damki Suchiang, Waheh Chnong Khatkasla, ka Esyndet Dkhar na ka chnong Barato, u C. Tangliang, Waheh Chnong Iooksi Iapkhla wa na u kyrtong wei ya ka yalang da pynlai da u Titos Shadap na ka chnong Barato.
U Damki Suchiang uwa man leh uwa kyrchaan warim ka NPP, hawa e yei klam da ong u wa i daw wa e u i kyrchaan ya u Nehemayah Tyngkan toh neidaw wa kwah u wow kyrchaan ya para wa dooh wa rangli, para wym em spah em phaw wa para wa khian wa nai.
Kamtæ da kyrpaad u leh ya ki paidbah wym toh u yooluti u ya ka bai cha bai dud, ka bai dawai dachin wei wym toh u paan poisa na u kyrtong, tangwa toh u yieñ skem haka yurim khlem da chah pynbiej neibynta wow pynjop emburom ya u Nehemayah Tyngkan.
Neiliang won u Nehemayah Tyngkan da e khublei kyrpang u ya waroh kiwa kyrchaan warim ka UDP kiwa da wan psiah cha ka Congress yow e yei kyrchaan wa pura ya oo.
“Ha ka Election wa dep, nga da rem salit O wei toh neidaw i sien nyngkong ya nga, wei nga ym pu chemphang bha hei lai luti, tangwa katni boon ki buit krehkaam da em O wei nga ye O wow pyntikna wa daw yoh wow khait ya u soh i jop,” da ong u Nehemayah.
Hawa kyrpaad ya kiwa kyrchaan wow kreh chitom neibynta yong oo da ong u, “Nga kyrpaad O ya kiwa kyrchaan wow man kiwa skem ha ka yurim, ym toh wow chah pynbiej ha uwon uwon.”
