Ki dkhot wa ki khynroo ka Congress nadooh ka Mahila Congress kamjooh ka Youth Congress da lai ki wow rah da ki Placard ha khyrdop yung u Lat ha Lok Bhavan, Shillong, yow beiñ yei chah khyrwit lathi ki khynroo wa lai puræ ynnin ka sngi ha nongbah Delhi.
Neiliang u Banphira Basaiawmoit da ong u wa ki khynroo wa lai puræ ym em de sñiaw chngaaiñ ki næ chaniah de ki ya ki bor pynlai ya ka chnat puræ puthi. Da ong u wa i mih yakhih ka Congress toh neidaw wym ye chah de wei sñiaw kthang yeiwa chah thombor ki khynroo. Da pynbaad u leh wa ka sorkar BJP da pynemkaam lut ko ki bor katwa ye wow yooh beiñ yei sur ki paidbah.
U Secretary ka Meghalaya Pradesh Congress Committee (MPCC), u Manuel Badwar da ong u wa ka i leh ka sorkar BJP man ko pyrchah yei hok katkam ka riti synchaar, khamtam hadien wa ki pulit da rah wei thombor ki ya 50 ngut ki MP wa kynthup ya uwa yahkhmat ka Liang Pyrchah, u Rahul Gandhi kiwa da lai yakhih hakhmat yung u Modi.
Da ong u wa u Montri Rangbah wa ka sorkar waroh kawi ym bna ki yei yakhih wei i dawa, heiwa da ong u wa i yakhih ha khyrdop yung u Lat toh neidaw wa ka Lok Bhavan toh ka thaw wa ye wow pynsñiaw cha ka sorkar pyrdi.
Ha kani ka yakhih da rah leh ya ki Placrd wow beiñ ya ka sorkar BJP wei wow dawa leh wa u Montri ka chnat Puræ Puthi yong ka ri toh u hiar chuki u.
Discussion about this post